তেজপুৰ কেন্দ্ৰীয় বিশ্ববিদ্যালয়ৰ সমাৱৰ্তনত প্ৰধানমন্ত্ৰী মোডী

অসমৰ আগশাৰীৰ উচ্চ শিক্ষা প্ৰতিষ্ঠান তেজপুৰ কেন্দ্ৰীয় বিশ্ববিদ্যালয়ৰ 18 সংখ্যক সমাৱৰ্তনত অংশগ্ৰহণ কৰিব প্ৰধানমন্ত্ৰী নৰেন্দ্ৰ মোডীয়ে ৷ কেন্দ্ৰীয় শিক্ষা মন্ত্ৰালয় আৰু তেজপুৰ বিশ্ববিদ্যালয় কৰ্তৃপক্ষই জনাইছে এই তথ্য ৷

নিউজ ডেস্ক, 21 জানুৱাৰী :অসম তথা ভাৰতৰ আগশাৰীৰ উচ্চ শিক্ষা প্ৰতিষ্ঠান তেজপুৰ কেন্দ্ৰীয় বিশ্ববিদ্যালয়ৰ 18 সংখ্যক সমাৱৰ্তন 22 জানুৱাৰীত অনুষ্ঠিত হ’ব ৷ কোভিড মহামাৰীৰ প্ৰতি লক্ষ্য ৰাখি প্ৰথমবাৰৰ বাবে এইবাৰ ভাৰ্চুৱেলি অনুষ্ঠিত হ’ব সমাৱৰ্তন অনুষ্ঠান য’ত 1218 গৰাকী শিক্ষাৰ্থীক তেওঁলোকৰ সন্মানীয় ডিগ্ৰীসমূহ প্ৰদান কৰা হ’ব ৷

আনহাতে বিশ্ববিদ্যালয়খনৰ এই সমাৱৰ্তন অনুষ্ঠানত ভাৰ্চুৱেলি অংশগ্ৰহণ কৰিব প্ৰধানমন্ত্ৰী নৰেন্দ্ৰ মোডী আৰু শিক্ষামন্ত্ৰী ৰমেশ পোখৰিয়াল নিশাংকে ৷ ইয়াৰ উপৰিও সমাৱৰ্তনত উপস্থিত থাকিব ৰাজ্যপাল অধ্যাপক জগদীশ মুখীৰ লগতে মুখ্যমন্ত্ৰী সৰ্বানন্দ সোণোৱাল ৷

অৱশ্যে ভাৰ্চুৱেলি অনুষ্ঠিত হ’লেও সন্মানীয় ডক্টৰেট ডিগ্ৰী আৰু সোণৰ পদক লাভ কৰা শিক্ষাৰ্থীসকলে এই সমাৱেশত পাৰ্থিৱভাৱে অংশগ্ৰহণ কৰিব ৷ 2020 চনত বিভিন্ন স্নাতক, স্নাতকোত্তৰ আৰু ডিপ্ল’মা উত্তীৰ্ণ মুঠ 1218 গৰাকী শিক্ষাৰ্থীক প্ৰদান কৰা হ’ব তেওঁলোকৰ সন্মানীয় প্ৰমাণপত্ৰসূহ ৷ মুঠ শিক্ষাৰ্থীসকলৰ ভিতৰত 48 গৰাকীয়ে শীৰ্ষস্থান অধিকাৰ লাভ কৰাৰ লগতে সোণৰ পদক লাভ কৰিবলৈ সক্ষম হৈছে ৷

লগতে পঢ়ক :তেজপুৰ বিশ্ববিদ্যালয়ৰ উদ্য়োগত CAAৰ বিৰুদ্ধে ‘Echoes From Hills’ শীৰ্ষক কাৰ্যসূচী