তেজপুৰ, ১৯ ডিচেম্বৰ :অসমৰ সংগীত, শিল্প, সংস্কৃতিৰ ক্ষেত্ৰলৈ বিশেষ বৰঙণি যোগোৱা গুণীসকলক সন্মান প্ৰদৰ্শনৰ উদ্দেশ্যে ২০০৩ চনত জন্মগ্ৰহণ কৰা তেজপুৰৰ 'চাতক' পৰিয়ালে চলিত বৰ্ষত দুগৰাকী বিশেষ ব্যক্তিক চাতক সন্মান(Chatak Sanman 2021) প্ৰদান কৰে । প্ৰসিদ্ধ চিত্ৰ পৰিচালক সমৰেন্দ্ৰ নাৰায়ণ দেৱ(Film director Samarendra Narayan Dev) আৰু প্ৰখ্যাত কণ্ঠশিল্পী তথা একেধাৰে গীতিকাৰ, সুৰকাৰ অপূৰ্ব বেজবৰুৱা(Singer Apoorva Bezbaruah)লৈ ২০২১ বৰ্ষৰ চাতক সন্মান আগবঢ়ায় চাতক পৰিয়ালে ।
সমৰেন্দ্ৰ নাৰায়ণে ১৯৭০ চনত ‘অৰণ্য' আৰু ১৯৭১ চনত ‘পুতলা ঘৰ' বোলছবিৰ বাবে আঞ্চলিক ভাষাৰ শ্ৰেষ্ঠ ছবিৰ সন্মান লাভ কৰিছিল । তেখেতে ‘সোণৰ হৰিণ', ‘কাজিৰঙাৰ কাহিনী', ‘বীৰ চিলাৰায়' আদিৰ দৰে বহুতো কথাছবিৰ লগতে দূৰদৰ্শনৰ ধাৰাবাহিক পৰিচালনা কৰে । ‘মাইজান তোকে দেখা পাই', ‘লগ দিয়াৰ কথা আছিল', ‘বোকাৰ মৰমে আঁকোৱালি' আদি অজস্ৰ গীতৰ স্ৰষ্টা অপূৰ্ব বেজবৰুৱালৈ ২০২১ বৰ্ষৰ জিতেন্দ্ৰ নাথ ভট্টাচাৰ্য-বিমলা ভট্টাচাৰ্য সোঁৱৰণী চাতক সন্মান প্ৰদান কৰা হয় ।