তেজপুৰ, 5 ছেপ্তেম্বৰ :চীন আৰু ভাৰতৰ সেনাৰ মাজত যুদ্ধ সদৃশ পৰিৱেশৰ সৃষ্টি হৈ থকা সময়তে দৈনিক ন-ন তথ্য পোহৰলৈ আহিব ধৰিছে । অৰুণাচল প্ৰদেশৰ উজনি সোৱণশিৰিৰ নাচু ৰাজহ চক্ৰৰ অন্তৰ্গত ভাৰত-চীন সীমান্তৰ মেক মোহন লাইনৰ সমীপৰ পৰা 5 জন তাগিন জনগোষ্ঠীৰ যুৱকক চীনৰ পি এল এ সৈন্যই বন্দী কৰি নিয়াৰ তথ্য দিছে পাছিঘাটৰ কংগ্ৰেছ বিধায়ক তথা প্ৰাক্তন কেন্দ্ৰীয় মন্ত্ৰী নিনং এৰিং আৰু বৰ্তমানৰ বিজেপিৰ সাংসদ তাপীৰ গাঁৱে ।
ইয়াৰ লগে-লগে কংগ্ৰেছৰ বিধায়ক নিনং এৰিঙে টুইটাৰত উল্লেখ কৰি কয় যে, ডিবাং ভেলীৰ সীমাত বিশিঙ অঞ্চলৰ ওচৰত চীনা কমিউনিষ্ট পাৰ্টিৰ সহযোগত চীনা সৈন্যই কেবাটাও নতুন পথ নিৰ্মাণ কৰাৰ দৃশ্য চেটেলাইটৰ জৰিয়তে সংগ্ৰহ কৰা হৈছে । এৰিঙৰ মতে সীমান্তৰ ডিবাং ভেলীৰ আই টি বি পিৰ শেষ নিৰীক্ষণ শিবিৰৰ ডিম্বেনৰ পৰা প্ৰায় 100 কিল'মিটাৰ দূৰত্বত এই পথ নিৰ্মাণ কৰিছে । এই পথছোৱা 2019ৰ আগষ্ট মাহৰ পৰা 2020 এপ্ৰিল আৰু আগষ্ট মাহৰ ভিতৰত সম্পূৰ্ণ কৰা হৈছে ৷ যিটো ভাৰত চৰকাৰৰ বাবে এক ভয়াবহ বিষয় ৷ চীনৰ এই কৌশলৰ বিষয়ে ভাৰতৰ প্ৰতিৰক্ষা মন্ত্ৰী, প্ৰধানমন্ত্ৰী আৰু গৃহমন্ত্ৰীক টুইট যোগে জনাইছে বিধায়কগৰাকীয়ে ৷ অৰুণাচলৰ ভাৰত-চীন সীমান্তত বিগত আগষ্ট মাহৰ পৰা এক ভয়াৱহ পৰিস্থিতিয়ে বিৰাজ কৰিছে ।