ৰঙাপৰাৰ ফুলবাৰী চাহ বাগিচাত ব্যতিক্ৰমী ৰূপত মুখ্যমন্ত্ৰী সৰ্বানন্দ সোণোৱাল

ফুলবাৰী চাহ বাগিচাত নিৰ্বাচনী প্ৰচাৰত মুখ্যমন্ত্ৰী ৷ চাহ শ্ৰমিকসকলৰ সৈতে মত-বিনিময় ৷

শোণিতপুৰ,16 অক্টোবৰ:শোণিতপুৰৰঙাপৰাৰ ফুলবাৰী চাহ বাগিচাত বুধবাৰে উপস্থিত হয় মুখ্যমন্ত্ৰী সৰ্বানন্দ সোণোৱাল । বিজেপিৰ প্ৰাৰ্থী ৰাজেন বৰঠাকুৰৰ হৈ নিৰ্বাচনী প্ৰচাৰ চলোৱাৰ উদ্দেশ্যৰে ৰঙাপৰাৰ ফুলবাৰী চাহ বাগিচাত হেলিকেপ্টাৰৰে আহি উপস্থিত মুখ্যমন্ত্ৰী হোৱা সোণোৱালে চাহ শ্ৰমিক, ৰাইজৰ সৈতে মত-বিনিময় কৰে ।

মুখ্যমন্ত্ৰী সৰ্বানন্দ সোণোৱালে নিজৰ জন্মস্থান চাবুৱাত শৈশৱকালত খাৰজান চাহ বাগিচাত কটোৱা মধুৰ স্মৃতিৰ কথা ৰাইজৰ আগত উল্লেখ কৰে ৷ খাৰজান চাহ বাগিচাৰ ১৪ আৰু ৭নং শ্ৰমিক লাইনত অনুষ্ঠিত হোৱা দুৰ্গা পূজা আৰু কালি পূজা উপভোগ কৰাৰ কথাও মুখ্যমন্ত্ৰীগৰাকীয়ে সোঁৱৰে ৷

বিগত ৫৫ বছৰে দিল্লী আৰু ৰাজ্যত ৰাজত্ব কৰা কংগ্ৰেছে চাহ শ্ৰমিকসকলৰ মনৰ বেদনা উপলব্ধি কৰিব নোৱাৰিলে বুলি সমালোচনা কৰি বিগত তিনিবছৰত বিজেপিয়ে কৰা কামৰ উল্লেখ কৰে ৷ তেওঁ কংগ্ৰেছে ৫৫ বছৰত কৰিব নোৱাৰা কাম বিজেপিয়ে 3 বছৰত কৰা বুলি ৰাইজৰ আগত মন্তব্য কৰে ৷ ভাষণ প্ৰসংগত মুখ্যমন্ত্ৰী সৰ্বানন্দ সোণোৱালে বিজেপি চৰকাৰে ৰাজ্যৰ গৰ্ভৱতী মহিলাসকলক ১০ হাজাৰকৈ টকা দিয়াৰ ব্যৱস্থা কৰাৰ আঁচনিৰ কথাও ৰাইজক জনায় ৷