সম্ভাৱনাৰ ৰৌদ্ৰোজ্বল বাটেৰে শিৱসাগৰৰ এখন ব্যতিক্ৰমী গাঁও

কৰ্মসংস্কৃতিৰে জাতিষ্কাৰ আমগুৰিৰ বেলিমুখীয়া চাংমাই গাঁও ৷ ক্ষুদ্ৰ উদ্যোগৰ বিকশিত ৰূপ ৷

শিৱসাগৰ, 9 অক্টোবৰ: শিৱসাগৰ জিলাৰ ঐতিহাসিকভাৱে সমৃদ্ধ বেলিমুখীয়া চাংমাই গাঁও । আমগুৰি ৰাজহ চক্ৰৰ অন্তৰ্গত গাঁওখনত আহোম ৰজাৰ দিনত দুষ্ট প্ৰকৃতিৰ ব্যক্তিক বেলিৰ ফালে মুখ কৰি শাস্তি দিয়াৰ বাবে বেলিমুখীয়া হোৱা বুলি কয় । আনহাতে কোনো কোনোৱে কয় দক্ষিণমুৱাকৈ এজন ব্যক্তি থিয় হ'লে বেলিটো মুখতে পৰে বাবে বেলিমুখীয়া হ'ল বুলি ক'ব খোজে ।

ধৰ্মীয় ৰীতি-নীতিৰে সমৃদ্ধ গাঁওখনৰ বয়োজ্যেষ্ঠসকলে একতাৰ ডোলেৰে সম্প্ৰীতিৰে হৰি নামৰ অমিয়া মাদকতাত ডুব যায় ।

কৃষিজীৱি গাঁওখনৰ বহু পৰিয়ালে পাচি, খৰাহী, জাকৈ, বিচনী, জুলুকী সাজি পৰিয়াল পোহপাল দি আহিছে । কিছু পৰিয়ালে জাল গোঁঠি বিক্ৰী কৰিও আহিছে । মহিলাসকলেও পাতিধৰা বনাই কৰ্মসংস্কৃতিৰ নিদৰ্শন দাঙি ধৰি আহিছে । গাঁওখনৰ বিৰেন বৰুৱা, দুলু ৰাজখোৱা, ৰাতুল বৰুৱাকে ধৰি বহুকেইটা পৰিয়ালে এৰীপলু পুহি জীৱিকা নিৰ্বাহ কৰি আহিছে ।

মহিলাসকলো কোনো ক্ষেত্ৰতে পিছপৰা নহয়। জেউতি আত্মসহায়ক গোটৰ যোগেদি মেখেলা, চাদৰ, গামোচা, ৰুমাল বৈ উলিওৱাৰ লগতে ড'ৰমেট, চেয়াৰ বেগ, ফুলদানিৰ যোগেদিও আৰ্থিকভাৱে আগবাঢ়ি গৈছে ।

গাঁওখনে শিক্ষাৰ ক্ষেত্ৰতো সম্ভাৱনা বহন কৰিছে । ছাত্ৰ-ছাত্ৰীসকলে শিক্ষাৰ আদিপাঠ গ্ৰহণ কৰা বিদ্যালয়খন পৰিস্কাৰ-পৰিচ্ছন্ন । শিক্ষাৰ্থীসকলে নিজ হাতেৰে অনন্য সুন্দৰ সামগ্ৰী সাজি উলিয়াই হাতৰ কামৰ পৰিচয় দাঙি ধৰিবলৈ সক্ষম হৈছে ।চৰকাৰীভাৱে পিছপৰা গাঁওখনক আগবঢ়াই নিবলৈ হ'লে বহু ক্ষেত্ৰত আৰ্থিকভাৱে সহযোগিতা আগবঢ়াব লাগিব । গাঁওতেই বিকাশৰ পূৰ্ণ সম্ভাৱনা থকাৰ পিছতো কৰ্মঠ মহিলাসকলক উপযুক্ত পৰিয়ালক চৰকাৰে আৰ্থিকভাৱে সহযোগিতা আগবঢ়ালে অসমৰ অৰ্থনীতি বহু পৰিমাণে আগবাঢ়ি যাব ।