আমগুৰিত ৰুচেংৰি সাংস্কৃতিক গোষ্ঠীৰ বিহু কৰ্মশালা

“হুচৰি এ চ’ত, আমি বিহু মাৰো য’ত, দেহি ঐ দূবৰি নগজে ত’ত ?” হেঁপাহৰ ৰঙালী বিহুটিক আদৰিবলৈ সাজু হৈছে ৰাজ্যবাসী ৷ ঢোল-পেঁপাৰ মাতত ৰজনজনাই উঠিছে আকাশ-বতাহ ৷ নৱ-প্ৰজন্মই ঢোল আৰু বিহুনাচ যাতে শুদ্ধকৈ পৰিৱেশন কৰে, তাৰবাবে আমগুৰিত ৰুচেংৰি সাংস্কৃতিক গোষ্ঠীৰ উদ্যোগত আয়োজন কৰা হৈছে বিহু কৰ্মশালাৰ ৷

আমগুৰি, ১৯ মাৰ্চ :অসমীয়াৰ হেঁপাহৰ ৰঙালী বিহুলৈ মাজত মাথো কেইটিমান দিন বাকী ৷ ৰাজ্যৰ চৌদিশ এতিয়া ঢোল-পেঁপাৰ মাতত ৰজনজনাই উঠিছে । শিৱসাগৰ জিলাৰ আমগুৰিতো দেখিবলৈ পোৱা গৈছে এক উৎসৱমুখৰ পৰিৱেশ ৷ ৰুচেংৰি সাংস্কৃতিক গোষ্ঠীয়ে প্ৰত্যেক বছৰৰ দৰে এইবছৰো অনুষ্ঠিত কৰিছে বিহু কৰ্মশালাৰ (Bihu Workshop in Amguri) ৷

বিহুনাচৰ লগতে ঢোলবাদ্যৰ প্ৰশিক্ষণ প্ৰদান কৰি কিশোৰ-কিশোৰীসকলক বিহুৰ প্ৰতি জড়িত কৰাই বিহুক শুদ্ধ ৰূপত জীয়াই ৰখাৰ বাবে এই প্ৰচেষ্টা হাতত লৈছে ৰুচেংৰি সাংস্কৃতিক গোষ্ঠীয়ে ৷ এই কৰ্মশালাত অসমৰ প্ৰায় 8 গৰাকী অভিজ্ঞ ব্যক্তিয়ে প্ৰশিক্ষণ প্ৰদান কৰিব ৷ বৰ্তমানলৈ প্ৰায় 84 গৰাকী প্ৰশিক্ষাৰ্থীয়ে এই কৰ্মশালাত অংশগ্ৰহণ কৰিছে ৷

অসমীয়াৰ বাপতি সাহোন বিহুটিক আদৰিবলৈ এনেদৰে সাজু হৈ উঠিছে প্ৰতিজন অসমীয়া । ক'ভিড পৰিস্থিতিৰ বাবে যোৱা বছৰ অসমীয়াই অনুষ্ঠিত কৰিব নোৱাৰিলে হেঁপাহৰ বিহুটি । অসমীয়াৰ মন-প্ৰাণ আৰু স্বাভিমানৰ প্ৰতীক ৰঙালী বিহু বুলি ক'লেই আনন্দত আত্মহাৰা হৈ উঠে সকলো ।

এনে অৱস্থাত বিহুবলীয়া অসমীয়াই কান্ধত ঢোলটি লৈ ঢোলৰ চাপৰত মুখৰিত কৰি তুলিছে আকাশ-বতাহ । উঠি অহা প্ৰজন্ময়েও ঢোল আৰু বিহুনাচ যাতে শুদ্ধকৈ পৰিৱেশন কৰে, তাৰ বাবে আমগুৰিত দেখা গ'ল ৰুচেংৰি সাংস্কৃতিক গোষ্ঠীৰ এনে পদক্ষেপ ।

লগতে পঢ়ক :দৌলগোবিন্দ মন্দিৰৰ পূজাত অংশগ্ৰহণ মুখ্যমন্ত্ৰীৰ