শিৱসাগৰ,9 মাৰ্চ :প্ৰথম পৰ্যায়ৰ নিৰ্বাচনৰ মনোনয়ন দাখিলৰ অন্তিম দিনত 108 নং শিৱসাগৰ সমষ্টিৰ বাবে মঙলবাৰে মনোনয়ন দাখিল কৰিলে বিজেপি দলৰ প্ৰাৰ্থী সুৰভী ৰাজকুমাৰীয়ে ৷ শিৱসাগৰ নগৰৰ কালীপ্ৰসাদ স্মৃতি ভৱন প্ৰাংগণৰ পৰা সহস্ৰাধিক সমৰ্থকৰ সৈতে ৰেলীৰে নিৰ্বাচনী বিষয়াৰ কাৰ্যালয়ত উপস্থিত হয় বিজেপিৰ প্ৰাৰ্থী গৰাকী ৷ আজি মনোনয়ন দাখিলৰ সময়ত প্ৰাৰ্থীগৰাকীক সংগ দিয়ে বিজেপি দলৰ ৰাজ্যিক সভাপতি ৰণজিৎ দাস আৰু যোৰহাট লোকসভা সমষ্টিৰ সাংসদ তপন গগৈয়ে ৷
সুৰভী ৰাজকুমাৰীক সংগ প্ৰদান কৰি ৰণজিৎ দাসে কয় যে, কংগ্ৰেছ দলৰ নিকৃষ্ট ৰাজনীতিৰ বাবে এইবাৰ শিৱসাগৰ সমষ্টিত বিজেপি দলৰ প্ৰাৰ্থী নিশ্চিতভাৱে জয়লাভ কৰিব ৷ আনহাতে, অবিভক্ত শিৱসাগৰ জিলাৰ ছয় সমষ্টিৰ ভিতৰত পাঁচ সমষ্টিত চাহ জনগোষ্ঠীৰ ভোটাৰৰ আধিপত্য থকাৰ পাছতো বিজেপি দলে এজনো চাহ জনগোষ্ঠীয় ভোটাৰক টিকট প্ৰদান নকৰাক লৈ সোধা প্ৰশ্ন এৰাই চলে সভাপতি গৰাকীয়ে ৷ তেওঁ কয়, বিজেপি চৰকাৰে চাহ জনগোষ্ঠীয় লোকৰ বাবে সৰ্বাংগীণ উন্নয়ন কৰি আহিছে ৷ প্ৰাৰ্থী প্ৰক্ষেপ কৰাৰ ক্ষেত্ৰত এই বিষয় বিবেচনা নহয় ৷