শিৱসাগৰ, 23 মে’: নৰক সদৃশ ৰাষ্ট্ৰীয় ঘাইপথ মেৰামতিৰ দাবীত সোমবাৰে ঘাইপথ অৱৰোধ কৰে আছুৱে (AASU protest against corruption in four lane construction) ৷ 37 নং ৰাষ্ট্ৰীয় ঘাইপথক চাৰি লেনযুক্ত পথলৈ ৰূপান্তৰিত কৰাৰ নামত হোৱা অভাৱনীয় অনিয়ম, দুৰ্নীতি হোৱা কাৰ্যৰ বিৰুদ্ধে শিৱসাগৰত এই প্ৰতিবাদী কাৰ্যসূচী ৰূপায়ণ কৰে সদৌ অসম ছাত্ৰ সন্থাৰ শিৱসাগৰ জিলা সমিতিয়ে ৷
সোমবাৰে দিনৰ 11 বজাৰ পৰা শতাধিক আছু কৰ্মীয়ে 37 নং ৰাষ্ট্ৰীয় ঘাই পথৰ দৰিকাপাৰত এই প্ৰতিবাদ সাব্যস্ত কৰে আছুৱে (AASU protest in Sivasagar) ৷ উল্লেখ্য যে, শিৱসাগৰ জিলাৰ ডিমৌৰ পৰা জাঁজী পৰ্য্যন্ত ৰাষ্ট্ৰীয় ঘাই পথ ছোৱাৰ অৱস্থা ইমানেই ভয়াৱহ হৈ পৰিছে যে সাধাৰণ ৰাইজে শিৱসাগৰৰ পৰা যোৰহাটৰ দিশলৈ যাবলৈ হ’লে ৰাষ্ট্ৰীয় ঘাইপথটোৰ পৰিৱৰ্তে জয়সাগৰ নামতি, চামগুৰি, আমগুৰি টাউন হৈ যাবলগীয়া পৰস্থিতিৰ উদ্ভৱ হৈছে ৷ একমাত্ৰ ৰাষ্ট্ৰীয় ঘাইপথছোৱাৰ এই অৱৰ্ণনীয় অৱস্থাৰ বাবেই নিতৌ দুৰ্ঘটনাত মৃত্যু হৈছে নিৰীহৰ ৷