নলবাৰী, 7 নৱেম্বৰ : নলবাৰীৰ বেচৰকাৰী স্বেচ্ছাসেৱী সংস্থা সৃষ্টিয়ে দীপাৱলীত ব্যৱহাৰ হোৱা কলগছসমূহ সংগ্ৰহ কৰি শনিবাৰে হাতীৰ খাদ্যৰ বাবে প্ৰেৰণ কৰে । স্বেচ্ছাসেৱী সংস্থাটোৱে বিগত দুদিন ধৰি নলবাৰী চহৰৰ লগতে জিলাখনৰ ভিন্ন প্ৰান্তৰ পৰা কলগছসমূহ নলবাৰী পৌৰসভাৰ সহায়ত সংগ্ৰহ কৰি নলবাৰী মহাবিদ্যালয় খেলপথাৰত জমা কৰি ৰাখিছিল ৷
বন্যহস্তীৰ বাবে প্ৰেৰণ দীপাৱলীত ব্যৱহাৰ হোৱা কলগছ
স্বেচ্ছাসেৱী সংস্থাটোৱে জিলাখনৰ বিভিন্ন প্ৰান্তৰ পৰা প্ৰায় ১৫,০০০ জোপা কলগছ সংগ্ৰহ কৰে ৷ সংস্থাটোৱে শনিবাৰে পাঁচখনকৈ গাড়ীত কলগছসমূহ বোজাই কৰি মানাহ ৰাষ্ট্ৰীয় উদ্যানত থকা হাতীৰ বাবে প্ৰেৰণ কৰে । ইফালে ৰাজ্যৰ বিভিন্ন প্ৰান্তত খাদ্যৰ অভাৱত অব্যাহত আছে হস্তী-মানৱৰ সংঘাত । এনে সময়ত স্বেচ্ছাসেৱী সংস্থা সৃষ্টিয়ে গ্ৰহণ কৰা এই পদক্ষেপে বন্যহস্তীৰ খাদ্যৰ ক্ষেত্ৰত যথেষ্ট সকাহ দিব বুলি আশা কৰা হৈছে ।