মুকালমুৱা চিকিৎসালয়ত মন্ত্ৰী পীযুষ হাজৰিকাৰ চাদেন ভিজিত!

মুকালমুৱা চিকিৎসালয়ত মন্ত্ৰী পীযুষ হাজৰিকাৰ তাৎক্ষণিক পৰিদৰ্শন ৷ ধন লোৱাৰ অভিযোগত চাকৰিৰ পৰা নিলম্বন চিকিৎসক ৰাতুল দাসক

নলবাৰী, 16 মে': বৃহস্পতিবাৰে তাৎক্ষণিকভাৱে মুকালমুৱা চিকিৎসালয়ত উপস্থিত হয় অসম চৰকাৰৰ ৰাজ্যিক স্বাস্থ্য মন্ত্ৰী পীযুষ হাজৰিকা ৷ উল্লেখ্য যে, মুকালমুৱা চিকিৎসালয়ত কৰ্মৰত প্ৰসূতি চিকিৎসক ৰাতুল দাসৰ বিৰুদ্ধে ধনৰ বিনিময়ত চিকিৎসা কৰাৰ গুৰুতৰ অভিযোগ উত্থাপন কৰিছিল প্ৰসন্ন তালুকদাৰ নামৰ এজন লোকে ৷ প্ৰসন্ন তালুকদাৰ নামৰ লোক জনৰ পত্নীৰ প্ৰসৱৰ সময়ত চিকিৎসক ৰাতুল দাসে ধন বিচৰাৰ ঘটনা অৱগত কৰিছিল মন্ত্ৰীগৰাকীক । উক্ত ঘটনাৰ বুজ ল'বলৈ চিকিৎসালয়খনত উপস্থিত হয় ৰাজ্যিক স্বাস্থ্য মন্ত্ৰী গৰাকী আৰু ধন লোৱাৰ অভিযোগত চাকৰিৰ পৰা নিলম্বন কৰে চিকিৎসক ৰাতুল দাসক ।

কেৱল সেয়াই নহয় চিকিৎসালয়খন পৰিদৰ্শন কৰাৰ সময়তেই চিকিৎসালয়ত উপস্থিত নাথাকি কৰ্তব্যত গাফিলতি কৰা চিকিৎসক প্ৰকাশ দাসক শাস্তিমূলক বদলিৰ নিৰ্দেশ মন্ত্ৰীগৰাকীৰ ৷ প্ৰতিগৰাকী স্বাস্থ্য কৰ্মীকে নিয়াৰিকৈ কৰ্তব্য পালন কৰিবলৈ কঠোৰ সকীয়নী মন্ত্ৰী পীয়ুষ হাজৰিকাৰ ৷ উল্লেখ্য যে, এই তাৎক্ষণিক পৰিদৰ্শনত মন্ত্ৰী গৰাকীৰ লগতে উপস্থিত হৈছিল NRHM ৰ কাৰ্যবাহী সঞ্চালক অচ্যুত বৈশ্য আৰু বিধায়ক নাৰায়ণ ডেকাও ।