বাঢ়নী পানীত বিধস্ত দুখনকৈ বাঁহৰ দলং

ৰহা চাপৰমুখত কপিলী নদীৰ বাঢ়নী পানীয়ে দুখনকৈ দলং উটুৱাই নিয়াত ব্যাহত হৈ পৰিছে যোগাযোগ ব্যৱস্থা । প্ৰায় পাঁচ ঘণ্টা ধৰি যোগাযোগ বন্ধ হৈ পৰাত হাহাকাৰ পৰিস্থিতিৰ সৃষ্টি হৈছে অঞ্চলটোৰ লোকসকলৰ মাজত ।

ৰহা, ৩ মে': ৰহা চাপৰমুখৰ কচুৱা ঘাট আৰু বামুণীজান ঘাটৰ বাঁহৰ দলং দুখন বাঢ়নী পানীয়ে উটুৱাই নিয়াত ব্যাহত হৈ পৰিছে যোগাযোগ ব্যৱস্থা । শুকুৰবাৰে পুৱা ফেনে - ফোটোকাৰে বাঢ়ি অহা কপিলীৰ ধলত নিমিষতে দলং দুখন ভাঙি পৰাত অঞ্চলটোত প্ৰায় পাঁচ ঘণ্টা ধৰি যোগাযোগ বন্ধ হৈ পৰে আৰু এক হাহাকাৰ পৰিস্থিতিৰ সৃষ্টি হয় ।

ইয়াৰ ফলত বিদ্যালয়লৈ বুলি অহা ছাত্ৰ - ছাত্ৰী আৰু শিক্ষকসকল ঘৰলৈ উভতি যাবলগা হয় । পাঁচ ঘণ্টাৰ পাছত নাৱেৰে যাত্ৰীসকলক ইপাৰ সিপাৰ কৰা হয় । উল্লেখ্য যে এই বাঁহৰ দলং দুখনেই ৰহাৰ চহৰী মৌজা আৰু পশ্চিম কাৰ্বি আংলঙৰ এটা বৃহত্তৰ অঞ্চলৰ জনসাধাৰণৰ যোগাযোগৰ একমাত্ৰ মাধ্যম ।