নগাঁও মহাবিদ্যালয়ত বিজ্ঞানী উদ্ধৱ ভৰালীৰ মত বিনিময় অনুষ্ঠান

নগাঁও মহাবিদ্যালয়ত ছাত্ৰ-ছাত্ৰীৰে মত বিনিময় কৰে বিজ্ঞানী উদ্ধৱ ভৰালীয়ে ৷ এই অনুষ্ঠানতে ৰোগীৰ বাবে নিজৰ পৰৱৰ্তী উদ্ভাৱনৰ বিষয়ে জানিবলৈ দিয়ে বিজ্ঞানীগৰাকীয়ে ৷

নগাঁও, 13 নৱেম্বৰ :বুধবাৰে নগাঁও মহাবিদ্যালয়ত উপস্থিত হৈ ছাত্ৰ-ছাত্ৰীসকলৰ সৈতে মত বিনিময় কৰে বিশিষ্ট বিজ্ঞানী তথা উদ্ভাৱক পদ্মশ্ৰী ডঃ উদ্ধৱ ভৰালীয়ে ৷ অনুষ্ঠানত বিশিষ্ট বিজ্ঞানীগৰাকীয়ে ছাত্ৰ-ছাত্ৰীক নিজৰ জীৱনৰ সফলতাৰ বিষয়ে ব্যাখ্যা কৰি কয় যে, জীৱনত অসম্ভৱ বুলি কোনো বস্তু নাই ৷ প্ৰযুক্তিৰ প্ৰসাৰৰ ক্ষেত্ৰত নগাঁও মহাবিদ্যালয় দেশৰ ভিতৰতে অদ্বিতীয় বুলি মন্তব্য কৰে ভৰালীয়ে । মহাবিদ্যালয়খনৰ ছাত্ৰ-ছাত্ৰীৰে মত বিনিময় কৰি নিজৰ সময় সাৰ্থক হোৱা বুলি মন্তব্য কৰে বিজ্ঞানী গৰাকীয়ে ৷

অনুষ্ঠানতে মহাবিদ্যালয়খনৰ অধ্যক্ষ ডঃ শৰৎ বৰকটকীয়ে গ্ৰহণ কৰি অহা বিভিন্ন পদক্ষেপৰ প্ৰশংসা কৰে উদ্ধৱ ভৰালীয়ে ৷ ৰোগীৰ বাবে নিজৰ পৰৱৰ্তী উদ্ভাৱনৰ বিষয়েও জানিবলৈ দিয়ে বিজ্ঞানীগৰাকীয়ে ৷

উল্লেখ্য যে, নগাঁও মহাবিদ্যালয়ৰ পদাৰ্থ আৰু ৰাসায়নিক বিজ্ঞান বিভাগে এক নতুন পদক্ষেপ গ্ৰহণ কৰিছে ৷ বজাৰত উভৈনদী হৈ পৰা বিভিন্ন বিষাক্ত খাদ্য-সামগ্ৰী বিষমুক্ত কৰিবলৈ প্ৰকল্প লৈছে মহাবিদ্যালয়খনৰ দুই বিভাগে ৷ কম খৰচতে অ'জন গেছ প্ৰয়োগেৰে শাক পাচলি, মাছ আদি খাদ্য-সামগ্ৰী বিষাক্তমুক্ত কৰাৰ কাম ইতিমধ্যেই আৰম্ভ কৰিছে মহাবিদ্যালয়খনে ।

উল্লেখযোগ্য যে, নগাঁও মহাবিদ্যালয়ত ছাত্ৰ-ছাত্ৰীৰে মত বিনিময় অনুষ্ঠানত অংশগ্ৰহণ কৰাৰ পূৰ্বে নগাঁও চৰকাৰী বালক উচ্চতৰ মাধ্যমিক বিদ্যালয় প্ৰেক্ষাগৃহত অনুষ্ঠিত এক গাম্ভীৰ্যপূৰ্ণ অনুষ্ঠানত প্ৰয়াত ডঃ জিতেন গোহাঁইৰ সোঁৱৰণত বিদ্যালয়খনক সেউজ বঁটা প্ৰদান কৰে বিজ্ঞানী ডঃ উদ্ধৱ ভৰালীয়ে ৷

আৰু পঢ়ক :অন্ত পৰিল অল আছাম স্পৰ্ট কিক বক্সিং চেম্পিয়নশ্বিপ, 2019