ৰাজ্য কঁপাইছে মধ্যাহ্ন ভোজন কৰ্মীৰ প্ৰতিবাদে

বিদ্যালয়সমূহত মধ্যাহ্ন ভোজন যোগানৰ দায়িত্ব এন জি অক দিয়া ৰাজ্য চৰকাৰৰ সিদ্ধান্তৰ বিৰুদ্ধে ৰাজ্যজুৰি ৰাজপথত নামিল মধ্যাহ্ন ভোজন কৰ্মী ৷ শিক্ষক, ছাত্ৰ-ছাত্ৰী, আৰু অভিভাৱকেও সহযোগ কৰিলে ৰন্ধনকৰ্মীৰ প্ৰতিবাদত ৷

নিউজ ডেস্ক, 4 নৱেম্বৰ: সোমবাৰে প্ৰায় ডেৰ লাখ থলুৱা ৰন্ধনকৰ্মীৰ পেটত লাঠ মাৰি মধ্যাহ্ন ভোজন যোগানৰ দায়িত্ব এন জি ওক দিয়াৰ ৰাজ্য চৰকাৰৰ হঠকাৰী সিদ্ধান্তৰ বিৰুদ্ধে ৰাজ্যজুৰি প্ৰতিবাদত নামিল ৰন্ধনকৰ্মী ৷ চৰকাৰৰ এই সিদ্ধান্তৰ বিৰুদ্ধে ৰাজ্যৰ বিভিন্ন প্ৰান্তত ৰাজপথ উত্তাল কৰি তুলিলে ৰন্ধনকৰ্মী সকলে ৷

ডুমডুমাত ঘনশ্যাম সেৱা সমিতি নামৰ এটা ব্লেক লিষ্টেড এন জি অ'ই বিদ্যালয়ত বিতৰণ কৰিবলৈ অহা খাদ্য দলিয়াই পেলালে শতাধিক ৰন্ধনকৰ্মীয়ে ৷ নগাঁৱ জিলাৰ ননৈ উচ্চ বুনিয়াদী বিদ্যালয়তো সময়মতে ছাত্ৰ-ছাত্ৰীক মধ্যাহ্ন ভোজন প্ৰদান নকৰাক লৈ সৃষ্টি হ'ল উতপ্ত পৰিস্থিতি ৷ মুনলাইট নামৰ এটা এন জি অই ছাত্ৰ ছাত্ৰীক নিৰ্দিষ্ট সময়ত যোগান নিদিয়াক লৈ অভিভাৱকসকলে উভতাই পথালে মধ্যাহ্ন ভোজন ৷ ইফালে গোলাঘাট জিলাৰ খুমটাইটো ভেজাল খাদ্য যোগানৰ অভিযোগত ৰাইজে ঘূৰাই পঠালে এন জি অৰ মধ্যাহ্ন ভোজন ৷ দলগাঁৱৰ কুঁৱৰীপুখুৰী ছিদ্দকীয়া এম ই মাদ্ৰাছাও উত্তাল হৈ পৰিল এন জি অই দুৰ্গন্ধময় টেঙা দালি-ভাত যোগান ধৰাৰ অভিযোগত ৷ এই সন্দৰ্ভত চাওঁ আহক ইটিভি ভাৰতৰ এক প্ৰতিবেদন ৷