নগাঁও, 16 নৱেম্বৰ : ৰাজ্যত তীব্ৰতৰ হৈ পৰিছে নিচাযুক্ত সামগ্ৰী বিৰোধী অভিযান ৷ বিভিন্ন ঠাইত প্ৰত্যেক দিনাই আৰক্ষীয়ে বৃহৎ পৰিমাণৰ নিচা জাতীয় সামগ্ৰী জব্দ কৰাৰ লগতে আটক কৰিছে নিচাযুক্ত সামগ্ৰী সৰবৰাহৰ লগত জড়িত বহু লোকক ৷ সমান্তৰালভাৱে নগাঁও আৰক্ষীয়েও নিচাযুক্ত সামগ্ৰীৰ বিৰুদ্ধে অভিযান তীব্ৰতৰ কৰি তুলিছে ৷
এইবাৰ নগাঁও আৰক্ষীয়ে বিৰহ বেবেজীয়াত জব্দ কৰিছে 1 কেজি ভাং সহ নগদ 45 হাজাৰৰো অধিক টকা ৷ সোমবাৰে জিলাখনৰ অতিৰিক্ত আৰক্ষী অধীক্ষক ধ্ৰুৱ বৰাৰ নেতৃত্বত নগাঁৱৰ বিৰহ বেবেজীয়াৰ দিলিপ বৰা নামৰ লোক এজনৰ বাসগৃহত এক অভিযান চলায় ৷
এই অভিযানত আৰক্ষীয়ে উদ্ধাৰ কৰে বৃহৎ পৰিমাণৰ নগদ ধন আৰু ভাং ৷ লগতে উক্ত অভিযানটোত আৰক্ষীৰ দলটোৱে অভিযুক্ত দিলিপ বৰাক আটক কৰে ৷
উল্লেখ্য যে বিগত দিনকেইটাত নগাওঁ জিলা আৰক্ষী অধীক্ষক আনন্দ মিশ্ৰৰ নেতৃত্বত নগাঁৱৰ বিভিন্ন ঠাইত নিচাযুক্ত সামগ্ৰীৰ বিৰুদ্ধে অভিযান চলোৱা হৈছে ৷ লগতে গ্ৰেপ্তাৰ কৰা হৈছে এই নিষিদ্ধ ব্যৱসায়ৰ লগত জড়িত বহু লোকক ৷ আই পিছ এছ বিষয়া আনন্দ মিশ্ৰই নগাঁৱৰ আৰক্ষী অধীক্ষক হিচাপে যোগদান কৰিয়েই হৰণ কৰিছে অপৰাধীৰ নিদ্ৰা । অভিযান চলাই বিভিন্ন সময়ত বহু নিচাযুক্ত দ্ৰব্য জব্দ কৰাৰ লগতে আটক কৰিছে এই আন্ধাৰ জগতৰ লগত জড়িত বহু অপৰাধীক ৷ শেহতীয়াকৈ নগাঁৱৰ কদমনিত 18 মে'ত ড্ৰাগছৰ এটা ঘাটিত অভিযান চলাই বৃহৎ পৰিমাণৰ ব্ৰাউন চুগাৰ, হেৰ'ইনসহ ইয়াৰ লগত জড়িত ব্যৱসায়ীক আটক কৰিবলৈ সক্ষম হৈছিল ।
নগাঁৱৰ আৰক্ষী অধীক্ষক হিচাপে আনন্দ মিশ্ৰৰ যোগদানে নগাঁৱৰ এটা মহলক আনন্দিত কৰাৰ বিপৰীতে এতিয়া নিদ্ৰা হৰিছে অপৰাধ জগতৰ লগত জড়িত সকলৰ । ড্ৰাগছৰ ঘাটিতো ইতিমধ্যে বৰভূঁইকপৰ দৰেই কঁপনিৰ সৃষ্টি কৰিছে আনন্দ মিশ্রৰ যোগদানে ।
লগতে পঢ়ক :Goalpara Murder : আকৌ ওলাইছে পৰশুৰাম ! মাতৃহন্তাক কৰায়ত্ত আৰক্ষীৰ
