নগাঁও, 4 চেপ্তেম্বৰ : বছৰৰ তিনিটাকৈ বানে বিধ্বস্ত কৰিলে লাওখোৱাৰ বাট পথ । একপ্ৰকাৰ বিচ্ছিন্ন হৈ পৰিছে যাতায়ত ব্যৱস্থা । যাতায়তৰ নামত চৰম হাৰাশাস্তিৰ সন্মুখীন হৈছে কেইবাখনো গাঁৱৰ বাসিন্দা । পথৰ মাজতে ঠায়ে ঠায়ে পুখুৰী সদৃশ গাঁত হোৱাৰ বাবে গাঁওখনলৈ নাহে 108 এম্বুলেঞ্চ সেৱা । ফলত চিকিৎসালয়লৈ নিব নোৱাৰে জৰুৰী অৱস্থাৰ ৰোগী । ইয়াৰ মাজতে গড়কাপ্তানি বিভাগৰ এজন ঠিকাদাৰৰ কাণ্ডই কঁপালত তুলিব সকলোৰে চকু । পথৰ দাঁতিৰ মাটি কাটিয়েই পথ মেৰামতিৰ নামত জোৰা টাপলি মৰাৰ চেষ্টা ঠিকাদাৰজনৰ । এই সম্পৰ্কত ই টি ভি ভাৰতৰ এক বিশেষ প্ৰতিবেদন ।
লাওখোৱাৰ ভগামুখৰ অন্তৰ্গত সাতটাকৈ অঞ্চলত ব্ৰহ্মপুত্ৰৰ বাঢ়নী পানীয়ে চলিত বর্ষতে সৃষ্টি কৰিছিল বিভীষিকাৰ । অঞ্চলকেইটাৰ ঘৰ দুৱাৰ, বাট পথ সকলো ডুব গৈছিল বাঢ়নী পানীত । বুঢ়াচাপৰি অভয়াৰণ্যলৈ যোৱা একমাত্ৰ পথটোও বৰ্তমান হৈ পৰিছে বৃহৎ পুখুৰীসদৃশ । বান শেষ হোৱা এটা মাহেই পাৰ হ'ল যদিও অভয়াৰণ্যখনলৈ যোৱা পথছোৱাৰ মেৰামতিৰ বাবে এই পৰ্যন্ত নহ'ল কোনো ব্যৱস্থা । ইপিনে ভগামুখ অঞ্চলৰ বাট পথৰ এই দুৰৱস্থাৰ বাবে চাৰিচকীয়া আৰু তিনিচকীয়া বাহনৰো সম্ভৱ হোৱা নাই যাতায়ত । কোনো বাহন চলাচল কৰিব নোৱাৰা বাট পথৰ এনে অৱস্থাৰ বাবেই এইকেইখন গাঁৱলৈ আহিব নোৱাৰে 108 এম্বুলেঞ্চ সেৱা । যাৰ ফলত জৰুৰী ৰোগীক লৈ যথেষ্ট সমস্যাৰ সন্মুখীন হ'বলগীয়া হৈছে গাঁওবাসী ।
বানে ছিঙি নিয়া লাওখোৱাৰ 6 নং ভগামুখৰ এটা গড়কাপ্তানি পথটোৰে 7 নং ভগামুখলৈ যোৱা হয় ৷ এই পথছোৱা এইবাৰেই নহয় প্ৰতি বছৰেই ছিগি নিয়ে লুইতৰ বাঢ়নী পানীয়ে । প্ৰতিবাৰে জোৰা টাপলিৰে মেৰামতিও কৰা হয় পথছোৱা ৷ স্থানীয় লোকৰ অভিযোগ অনুসৰি একাংশ ঠিকাদাৰৰ গাফিলতিৰ বাবেই প্ৰতি বছৰেই ছিগি যায় পথছোৱা ।