ধিঙৰ এটা দৰিদ্ৰ পৰিয়াললৈ স্বৰ্ণকন্যা হিমা দাসে আগবঢ়ালে 20 হাজাৰ টকা

জটিল ৰোগত আক্ৰান্ত হৈ গুৱাহাটী চিকিৎসা মহাবিদ্যালয় হাস্পতালত চিকিৎসাধীন হৈ আছে ধিঙৰ অতি দুখীয়া পৰিয়ালৰ এটি কিশোৰ ৷ ইফালে পুত্ৰক উন্নত চিকিৎসা কৰাবলৈ সহায়ৰ বাবে ৰাইজলৈ কৰুণ আহ্বান জনাইছে মাতৃ গৰাকীয়ে ৷

চামগুৰি,24 এপ্ৰিল:নগাঁও জিলাৰ ধিঙৰ এটি অতি দুখীয়া পৰিয়ালৰ হৃদয় বিদাৰক কাহিনী এটা যোৱা ২০ এপ্ৰিলত সংবাদ মাধ্যমত সবিস্তাৰে সম্প্ৰচাৰ হৈছিল ৷ সংবাদ মাধ্যমত বাতৰি সম্প্ৰচাৰ হোৱাৰ পাছতে দৃষ্টিগোচৰ হয় ধিঙৰ জীয়াৰী তথা স্বৰ্ণকন্যা ধিং এক্সপ্রেছ হিমা দাসৰ ৷ বৰ্তমান নিজ গৃহত উপস্থিত নাই যদিও হিমাই ফোনযোগে সকলো খবৰ লৈছে দুৰ্ভগীয়া পৰিয়ালটোৰ ৷

অকল খবৰ লোৱাই নহয়, হিমা দাসৰ ফেন ক্লাৱৰ কৰ্মকৰ্তা সকলৰ জৰিয়তে তাৎক্ষণিকভাৱে বিশ হাজাৰ টকা প্ৰদান কৰে মাতৃ গৰাকীক ৷ পিচৰ পৰ্যায়তো নিপুলৰ চিকিৎসাৰ ক্ষেত্ৰত প্ৰয়োজনীয় সহায় সহযোগীতা আগবঢ়াব বুলি স্বৰ্ণকন্যা হিমা দাসে সদৰি কৰে ৷ আনহাতে, স্থানীয় মহিলাসকলেও ঘৰে ঘৰে গৈ ৰাইজৰ পৰা দান-বৰঙনি সংগ্ৰহ কৰি দুৰ্ভগীয়া মাতৃ গৰাকীৰ হাতত প্ৰদান কৰিছে ৷

ইফালে ঘটনা অনুসৰি, স্বামী প্ৰবীন বৰা মৃত্যুৰ দুটা সপ্তাহ পাৰ নহওতেই কনমানি পুত্ৰৰ মগজুৰ জটিল ৰোগত আক্ৰান্ত হোৱাত গুৱাহাটা চিকিৎসা মহাবিদ্যালয় হাস্পতালত ভৰ্তি কৰিছিল মাতৃ গীতাঞ্জলী বৰাই ৷ ইফালে পুত্ৰক উন্নত চিকিৎসা কৰাবৰ বাবে প্ৰয়োজন হৈছে লক্ষ্যাধিক টকা ৷ ধনৰ অভাৱত পৰি অৱশেষত সংবাদ মাধ্যমযোগে ৰাইজ তথা চৰকাৰলৈ পুনৰ কাতৰ আহ্বান জনাইছে গীতাঞ্জলী বৰাই ৷

লগতে পঢ়ক-ডিব্ৰুগড়ত পুনৰ এজনৰ কৰ'ণাত মৃত্যু