নগাঁও, 20 ডিচেম্বৰ :দেশ কঁপাই যোৱা নীল-অভি হত্যাকাণ্ডৰ গোচৰত সোমবাৰে নগাঁও আদালতত সাক্ষ্যদান(Mob lynching of Abhi-Neel case) ডিফুৰ তদানীন্তন দুই আৰক্ষী বিষয়াই । নগাঁও জিলা ও সত্ৰ ন্যায়ধীশৰ আদালতত সাক্ষ্যদান কৰিলে দুই আৰক্ষী বিষয়াই । নগাঁও আদালতত উপ-পৰিদৰ্শক পৰ্যায়ৰ দুই এগৰাকী আৰক্ষী বিষয়াই দিয়া সাক্ষ্যদানত সন্তুষ্ট নীল-অভিৰ দুই পৰিয়ালৰ লোক ।
নীল-অভি হত্যাকাণ্ড গোচৰটোৰ মুঠ ৭১ জন সাক্ষীৰ ইতিমধ্যেই ৬৫ জন সাক্ষীৰ সাক্ষ্য গ্ৰহণ সম্পূৰ্ণ হৈছে নগাঁও আদালতত । ৬৫ জন সাক্ষীৰ ভিতৰত ডকমকাৰ দুই এক সাক্ষীয়ে ভাষ্য সলনি কৰাৰ চেষ্টা কৰিছিল যদিও অধিকাংশ সাক্ষীয়ে সত্য সাক্ষ্য প্ৰদান কৰা বুলি উল্লেখ কৰে নীল-অভিৰ পৰিয়ালৰ লোকে । অতি সোনকালেই গোচৰটোৰ আটাইকেইজন সাক্ষীৰ সাক্ষ্যদান সম্পন্ন হোৱাৰ সম্ভাৱনা ব্যক্ত কৰিছে নিলোৎপল দাস আৰু অভিজিত নাথৰ পিতৃয়ে ।
উল্লেখযোগ্য যে, ২০১৮ চনৰ জুন মাহতে সেউজীয়া কাৰ্বি ভূমিৰ প্ৰাকৃতিক সৌন্দৰ্য উপভোগ কৰিবলৈ গৈ এদল পাষণ্ডৰ হাতত প্ৰাণ দিবলগীয়া হৈছিল গুৱাহাটীৰ দুই যুৱক নিলোৎপল দাস আৰু অভিজিত নাথে । নীল অভিৰ হত্যাকাণ্ডক লৈ সমগ্ৰ ৰাজ্যজুৰি উঠিছিল প্ৰতিবাদৰ জোৱাৰ । প্ৰতিজন লোকেই মৃত্যুদণ্ড কামনা কৰিছিল নীল-অভি হত্যাকাণ্ডত জড়িত আটাইকেইজন দোষীৰ । সকলোৱে ফাৰ্ষ্ট ট্ৰেকত বিচাৰ প্ৰক্ৰিয়া চলোৱাৰো দাবী উত্থাপন কৰিছিল ।
অৱশ্যে নগাঁও আদালতত ক্ষিপ্ৰতাৰে বিচাৰ প্ৰক্ৰিয়া আৰম্ভ হৈছিল যদিও ক'ভিডসৃষ্ট পৰিবেশকে ধৰি বিভিন্ন কাৰণত আজিও সম্পন্ন হোৱা নাই বিচাৰ প্ৰক্ৰিয়া । ইপিনে নীল অভিৰ হত্যাকাণ্ডত জড়িত ব্যক্তিক দৃষ্টান্তমূলক শাস্তিৰ আশাত আজিও বন্দী নীল-অভিৰ পৰিয়ালৰ লগতে অসমবাসী । এনে ঘটনাৰ সৈতে জড়িত ব্যক্তিক দৃষ্টান্তমূলক শাস্তি প্ৰদান নকৰিলে গণ হত্যা(mob lynching)ৰ দৰে ঘটনা ৰোধ নহ’ব বুলি মন্তব্য কৰে ন্যায়ৰ আশাত বন্দী নিলোৎপল পিতৃয়ে । নীল-অভিৰ হত্যাকাণ্ডৰ গোচৰৰ আন দুগৰাকী সাক্ষীৰ সাক্ষ্যগ্ৰহণৰ বাবে মঙলবাৰে পুনৰ শুনানিৰ দিন ধার্য কৰিছে নগাঁও আদালতে ।
লগতে পঢ়ক :Neel-Abhi Murder : চূড়ান্ত ৰায়ৰ দিশে নীল-অভি হত্যাকাণ্ডৰ বিচাৰ প্ৰক্ৰিয়া
