টীয়কৰ ইলেক্ট্ৰনিক সংবাদ মাধ্যমৰ বাটকটীয়া মৃদুল বৰুৱাৰ বিয়োগ

টীয়কৰ নিউজ লাইভৰ সংবাদদাতা মৃদুল বৰুৱাৰ মঙলবাৰে মৃত্যু হয় । যকৃত ৰোগত আক্ৰান্ত হৈ যোৰহাটৰ মিচন হাস্পতালত চিকিৎসাধীন হৈ আছিল মৃদুল বৰুৱা ।

টীয়ক, 12 আগষ্ট :টীয়কৰ নিউজ লাইভৰ সংবাদদাতা মৃদুল বৰুৱাৰ মঙলবাৰে মৃত্যু হয় । যকৃত ৰোগত আক্ৰান্ত হৈ যোৰহাটৰ মিচন হাস্পতালত চিকিৎসাধীন হৈ আছিল মৃদুল বৰুৱা । নিশা 9.40 বজাত মৃত্যুক সাৱটি লয় সংবাদদাতা গৰাকীয়ে ৷ বৰুৱাৰ মৃত্যুত টীয়ক প্ৰেছ ক্লাব, যোৰহাট জিলা ই-মিডিয়া এছ'চিয়েচন, যোৰহাট জিলা সাংবাদিক সন্থা, যোৰহাট জিলা অসম প্ৰেছ কৰেছপণ্ডেন্ট ইউনিয়ন সমিতিয়ে শোক প্ৰকাশ কৰে ।

বৃহত্তৰ টীয়ক অঞ্চলৰ সংবাদ জগতৰ বাবে অন্যতম চিনাকী নাম হৈছে মৃদুল বৰুৱা । সুদীৰ্ঘ 12 টা বছৰে টীয়কৰ সংবাদ জগতখনত অতি নিষ্ঠা আৰু সততাৰে বোকা পানী গছকি অশেষ কষ্টৰে প্ৰতিটো খবৰ যুগুত কৰি বাতৰি পৰিবেশন কৰিছিল বৰুৱাই ৷ সাংবাদিকতাৰ জৰিয়তে টীয়কৰ সমাজ জীৱনত ইতিবাচক প্ৰভাৱ পেলোৱাৰ লগতে বিপদত আৰ্তজন সহায় কৰিছিল তেওঁ ৷ বিভিন্ন ৰাজহুৱা সমস্যা তথা ব্যক্তিগত সমস্যা, ইতিবাচক নেতিবাচক সকলো বাতৰি সুন্দৰকৈ উপস্থাপন কৰি এজন ভাল সংবাদকৰ্মীৰ পৰিচয় দিছিলৱ মৃদুল বৰুৱাই ৷ এজন প্ৰকৃত সংবাদকৰ্মীৰ সমান্তৰালকৈ মৃদুল বৰুৱা আছিল এজন সুনিপুন গিটাৰিষ্ট । অসমৰ ইমূৰৰ পৰা সিমূৰলৈকে বহুকেইজন প্ৰতিষ্ঠিত কন্ঠশিল্পীৰ সৈতে গীটাৰত আঙুলি বুলাই দৰ্শক-শ্ৰুতাৰ হৃদয় জিনিছিল বৰুৱাই ।

টীয়কৰ নিউজ লাইভৰ সংবাদদাতা মৃদুল বৰুৱাৰ বিয়োগ

কেৱল সাংবাদিক অথবা বাদ্যশিল্পী হিচাপেই নহয়, সমাজৰ অন্যতম আগৰণুৱা আৰু মৰমৰ ব্যক্তি মৃদুল বৰুৱাৰ মৃত্যুৰ খবৰ বিয়পি পৰাত অসংখ্য গুণমুগ্ধই ভিৰ কৰে মিছন হাস্পতালৰ চৌহদ ৷ সকলোৱে আহি পৰিয়ালক সমবেদনা জ্ঞাপন কৰে । ইয়াৰ পাচতে নিশাই তেওঁৰ মৃতদেহ টীয়কৰ বনাইস্থিত বাসগৃহলৈ লৈ যোৱা হয় । মৃত্যুৰ সময়ত মৃদুল বৰুৱাই বৃদ্ধ পিতৃ-মাতৃ, পত্নী আৰু 12 বছৰীয়া কন্যাক ইহ সংসাৰত এৰি থৈ যায় । বৰুৱাৰ এই অকাল মৃত্যুত জিলাখনৰ সমগ্ৰ সতীৰ্থ তথা সাংবাদিক, শিল্পী সমাজৰ লগতে বিভিন্ন দল সংগঠনে গভীৰ শোক প্ৰকাশ কৰিছে ৷ উল্লেখযোগ্য যে, টীয়কৰ বিভিন্ন দল-সংগঠন, অনুষ্ঠান তথা ব্যক্তি পুৱা বনাইস্থি গৃহত উপস্থিত হৈ তেওঁক শেষ শ্ৰদ্ধাঞ্জলি জ্ঞাপন কৰাৰ লগতে তেওঁৰ সততা আৰু শিল্পী সত্তাক শ্ৰদ্ধাৰে সোঁৱৰে ।

লগতে পঢ়ক :বিশ্বৰ প্ৰথম কোভিড-19ৰ প্ৰতিষেধক : ফিলিপাইনছৰ ৰাষ্ট্ৰপতিক প্ৰতিষেধকৰ প্ৰথম চিটা