মৰিয়নী, 30 এপ্ৰিলঃ যোৰহাট জিলাৰ মৰিয়নীস্থিত একমাত্ৰ বন্য প্ৰাণী অভয়াৰণ্য হোলোঙাপাৰ গিবন বন্য প্ৰাণী অভয়াৰণ্য । বিগত সময়চোৱাত এই অভয়াৰণ্যৰ পৰা খাদ্যৰ সন্ধানত জনাঞ্চলত প্ৰৱেশ কৰা বন্যহস্তীয়ে ইয়াৰ দাঁতিকাষৰীয়া অঞ্চল সমূহত বিস্তৰ ক্ষতিসাধন কৰি আহিছে। এই বন্যহস্তীৰ পালটোক ৰোধিবলৈ বনবিভাগে আজিপৰ্যন্ত কোনো দীৰ্ঘম্যাদী পৰিকল্পনা হাতত লোৱা পৰিলক্ষিত হোৱা নাই ।
আৰু পঢ়কঃ ডিগবৈ ঠাকুৰবাৰী মন্দিৰৰ সমীপত ভয়ংকৰ অগ্নিকাণ্ড
উল্লেখ্য যে, স্থানীয় ৰাইজে গিবন অভয়াৰণ্যৰ প্ৰবেশৰ পূৰ্বে এটা বনশিবিৰ স্থাপনৰ বাবে দীৰ্ঘদিনীয়া এক দাবী কৰি আহিছিল । ৰাইজৰ দাবীৰ প্ৰতি সঁহাৰি জনায় বনবিভাগে ধোদৰ আলিৰ সমীপত এবছৰৰ পূৰ্বে এটা বনশিবিৰ নিৰ্মাণ সম্পূৰ্ণ কৰে । কিন্তু অতি পৰিতাপৰ বিষয় নিৰ্মাণ সম্পূৰ্ণ হোৱাৰ পাচতো কাৰ্যত ব্যৱহাৰ নহ'ল এই শিবিৰটো । নানা অজুহাতত আজিও পৰিত্যক্ত হৈ আছে চৰকাৰী ধনেৰে নিৰ্মিত এই বনশিবিৰ । বৰ্তমান এই শিবিৰটোত একাংশ লোকে অনৈতিক কাৰ্যকলাপত লিপ্ত হোৱাৰো গুৰুতৰ অভিযোগ উত্থাপন কৰিছে স্থানীয় ৰাইজে ৷
