Rangali Bihu 2022 : টীয়কৰ পথাৰত জেং বিহু প্ৰদৰ্শন

পৰম্পৰা ৰক্ষা কৰি টীয়কৰ পথাৰত এদল মহিলাই প্ৰদৰ্শন কৰিলে জেং বিহু ৷ উত্তৰ প্ৰজন্মই যাতে এই পৰম্পৰা অটুট ৰাখিব পাৰে, তাৰেই কামনাৰে প্ৰতি বছৰে টীয়কৰ স্থানীয় মহিলাসকলে উদযাপন কৰি আহিছে জেং বিহু (Jeng Bihu celebrations at Teok) ৷

টীয়ক, 19 এপ্ৰিল :আজি অসমীয়াৰ জেং বিহু ৷ ঠাই ভেদে ইয়াক গাভৰু বিহু বুলিও জনা যায় ৷ অসমীয়াৰ সাত বিহুৰ অন্যতম এই জেং বিহুৰ আছে এক সুকীয়া বৈশিষ্ট্য ৷ জেং বিহুৰ দিনা গাঁৱৰ বোৱৰী, জীয়ৰী লগ হৈ পথাৰত নতুবা হাবিত একেলগে বিহু মাৰে (Jeng Bihu celebrations at Teok) ৷

ৰাজ্যৰ বিভিন্ন প্ৰান্তত উদযাপন কৰা হয় এই জেং বিহু অথবা গাভৰু বিহু ৷ কৰ্মসূত্ৰে বা বিবাহসূত্ৰে ঘৰৰ পৰা আঁতৰত থকা প্ৰতিজনী জীয়ৰী এই ব’হাগ বিহুৰ সময়তে ঘৰলৈ আহে(Rangali bihu celebrations in Assam) ৷ ঘৰলৈ আহিয়েই নিজৰ সখীসকলক লগ পাই আনন্দ-উল্লাসত এপাক বিহু মাৰে সকলোৱে ৷ তেনেদৰেই সকলোৱে মিলি আপোন ব’হাগক আদৰণি জনায় ৷

জেং বিহু সাধাৰণতে মহিলাসকলে প্ৰদৰ্শন কৰে ৷ মহিলাসকলে বিহু মাৰিবলৈ হাবি নতুবা পথাৰলৈ যোৱাৰ পৰত এডাল জেং মাটিত পেলাই থৈ যায়, যাতে তেওঁলোকৰ ওপৰত কোনো পুৰুষৰ চকু নপৰে ৷

পূৰ্বৰ পৰম্পৰা ৰক্ষা কৰি টীয়ক তেলীয়া গাঁৱৰ মহিলাসকলে মঙলবাৰে গোট খাই প্ৰদৰ্শন কৰে জেং বিহু ৷ বিহু গীত আৰু টকাৰ মাতত প্ৰকৃতিক উন্মনা কৰাৰ প্ৰয়াস কৰি নানা ৰং-ৰহইচৰ মাজেৰে আত্মহাৰা হৈছে তেওঁলোক ৷ এই পৰম্পৰা যাতে উঠি অহা প্ৰজন্মই অনুকৰণ কৰি চেনেহৰ বিহুটি উদযাপন কৰে, তাৰেই কামনা কৰে মহিলাসকলে ৷

লগতে পঢ়ক:বঢ়মপুৰৰ নৱম অসম আৰক্ষী বাহিনীয়ে প্ৰদৰ্শন কৰিলে হুঁচৰি