যোৰহাট, 29 জুলাই : দেশৰ লগতে ৰাজ্যত এতিয়া প্ৰতিদিনে বৃদ্ধি পাইছে ক'ভিড ৰোগীৰ সংখ্যা । ক'ভিড ৰোগক প্ৰতিহত কৰিবলৈ উঠি পৰি লাগিছে স্বাস্থ্য বিভাগৰ লগতে ৰাজ্য চৰকাৰে । তাৰ ব্যতিক্ৰম নহয় যোৰহাট জিলাৰ স্বাস্থ্য বিভাগো । যোৰহাট চিকিৎসা মহাবিদ্যালয়ৰ লগতে উপ-স্বাস্থ্য কেন্দ্ৰসমূহ সম্পূৰ্ণৰূপে ক'ভিড কেয়াৰ চেন্টাৰলৈ পৰিৱৰ্তন কৰা হৈছে ।
যোৰহাটত নাগৰিক সমাজৰ বিশেষ সংবাদমেল
কিন্তু এনে সময়তে ক'ভিডৰ বাহিৰে আন জটিল ৰোগত আক্ৰান্ত ৰোগীসকলৰ অৱস্থা শোচনীয় হৈ পৰিছে । উপযুক্ত চিকিৎসা নোপোৱাকৈ বহুলোকৰ মৃত্যু হোৱাৰ গুৰুতৰ অভিযোগ উত্থাপন কৰিছে যোৰহাটৰ নাগৰিক সমাজে । এই সম্পৰ্কত বুধবাৰে যোৰহাটৰ জেল ৰ'ড ক্লাৱত এখন গুৰুত্বপূৰ্ণ সংবাদমেলৰ আয়োজন কৰা হয় ৷ বিশিষ্ট অধিবক্তা ৰিন্টু গোস্বামীৰ উদ্যোগত অনুষ্ঠিত এই সংবাদমেলৰ পাচতে উপায়ুক্ত যোগেদি মুখ্যমন্ত্ৰীলৈ এখন স্মাৰক প্ৰত্ৰ প্ৰদান কৰা হয় ৷