তৰুণ গগৈ ছাৰ, ৰাহুল বাবা আৰু অমিত শ্বাহ...

তৰুণ গগৈ "ছাৰ", "ৰাহুল বাবা" আদি সম্বোধনেৰে মঙলবাৰে শ্ৰীমন্ত শংকৰদেৱ কলাক্ষেত্ৰত ভাষণ ৰাখে কেন্দ্ৰীয় গৃহমন্ত্ৰী অমিত শ্বাহে (Amit Shah at Srimanta Sankardeva Kalakshetra) ৷ অসমত বিজেপিৰ জনপ্ৰিয়তা আৰু সামৰিক বাহিনীৰ বিশেষ ক্ষমতা আইন প্ৰত্যাহাৰ প্ৰসংগত বক্তব্য় ৰাখিবলৈ গৈ এইদৰে মন্তব্য় কৰে গৃহমন্ত্ৰীগৰাকীয়ে ৷

নিউজ ডেস্ক, ১০ মে': প্ৰাক্তন মুখ্যমন্ত্ৰী তৰুণ গগৈ আৰু কংগ্ৰেছ নেতা ৰাহুল গান্ধীক তীৰ্যক সমালোচনাৰে মঙলবাৰে আক্ৰমণৰ লক্ষ্য কৰি লয় কেন্দ্ৰীয় গৃহমন্ত্ৰী অমিত শ্বাহে । শ্ৰীমন্ত শংকৰদেৱ কলাক্ষেত্ৰত মঙলবাৰে এক অনুষ্ঠানত ভাগ লৈ কেন্দ্ৰীয় গৃহমন্ত্ৰীগৰাকীয়ে কয়, " প্ৰাক্তন মুখ্যমন্ত্ৰী তৰুণ গগৈ "ছাৰ" এ এবাৰ কৈছিল বিজেপি ক'ত আছে দেখুৱাই দিয়ক । আজি মই কৈছো বিজেপি ইয়াত আছে । চাওক (Amit Shah targeted Tarun Gogoi) । "

প্ৰয়াত মুখ্যমন্ত্ৰী গৰাকীক এইদৰে সমালোচনা কৰাতেই ক্ষান্ত নাথাকি গৃহমন্ত্ৰীগৰাকীয়ে কংগ্ৰেছ নেতা ৰাহুল গান্ধীকো আক্ৰমণৰ লক্ষ্য কৰি লয় । সামৰিক বাহিনীৰ বিশেষ ক্ষমতা আইন সন্দৰ্ভত বক্তব্য আগবঢ়াবলৈ গৈ ৰাহুল গান্ধীক "ৰাহুল বাবা" বুলি সম্বোধন কৰি গৃহমন্ত্ৰী শ্বাহে কয় - " ৰাহুল বাবাক মই ক’ব খুজিছো যে তেওঁলোকে ২০১৯ ৰ নিৰ্বাচনত কেৱল অসমৰ জনতাক সন্তুষ্ট কৰিবলৈকে ইস্তাহাৰত সামৰিক বাহিনীৰ বিশেষ ক্ষমতা আইন (Withdrawal of AFSPA) প্ৰত্যাহাৰ কৰাৰ কথা উল্লেখ কৰিছিল ।''

তেওঁ পুনৰ কয়, " আমি সামৰিক বাহিনীৰ বিশেষ ক্ষমতা আইনখনতো প্ৰত্যাহাৰ কৰিলোৱেই, লগতে এনে এখন আইন প্ৰয়োগ কৰিবলগীয়া পৰিবেশেই এই অঞ্চলৰ পৰা নোহোৱা কৰিলো ।"

লগতে পঢ়ক :হিমন্ত চৰকাৰৰ বৰ্ষপুৰ্তিৰ বিশাল ৰাজহুৱা সভাত ভাগ ল’লে অমিত শ্বাহে