গুৱাহাটী, 10 মাৰ্চ : কেন্দ্ৰীয় বিত্ত আৰু কৰ্পোৰেট পৰিক্ৰমা মন্ত্ৰী নিৰ্মলা সীতাৰমণে বৃহস্পতিবাৰে গুৱাহাটীত অনুষ্ঠিত উত্তৰ-পূৰ্বাঞ্চলৰ ৰাজ্যসমূহৰ বাণিজ্য আৰু উদ্যোগৰ (Trade and Industry of North Eastern States) অংশীদাৰসকলৰ সৈতে বাজেট-পৰৱৰ্তী বাৰ্তালাপ শীৰ্ষক অনুষ্ঠানৰ অধ্যক্ষতা কৰে (Nirmala Sitharaman interacts on the Union Budget with various stakeholders) । উত্তৰ-পূব অঞ্চলৰ বিভিন্ন উদ্যোগৰ নেতা আৰু বাণিজ্য সংস্থাৰ প্ৰতিনিধিসকলক সম্বোধন কৰি সীতাৰমণে কয় যে, কেন্দ্ৰীয় চৰকাৰে দেশত ডিজিটেল আন্তঃগাঁথনি বৃদ্ধি আৰু প্ৰতিষ্ঠাৰ জৰিয়তে উন্নয়নৰ ওপৰত গুৰুত্ব দি কেন্দ্ৰীয় বাজেটত ভৱিষ্যতৰ বাবে বিভিন্ন পদক্ষেপ গ্ৰহণ কৰিছে ।
লগতে, চৰকাৰে বিভিন্ন ক্ষেত্ৰত প্ৰযুক্তি ব্যৱহাৰ কৰি আৰু ভাৰতক ডিজিটেলভাৱে সাজু কৰি অহা 25 বছৰত ভাৰতক শীৰ্ষস্থানত অধিষ্ঠিত কৰা হ'ব বুলি উত্থাপন কৰি ডিজিটেল ক্ষমতা স্থাপনৰ সন্দৰ্ভত কেন্দ্ৰীয় বিত্ত মন্ত্ৰীগৰাকীয়ে কয় যে, ডিজিটেল আন্তঃগাঁথনিৰ দ্বাৰা কৃষি, ঔষধ আৰু শিক্ষা আদি বিভিন্ন ক্ষেত্ৰত সহায় আগবঢ়োৱা হ'ব ৷ ইয়াৰলগতে, ডিজিটেল আন্তঃগাঁথনিৰ দ্বাৰা দেশৰ দূৰৱৰ্তী অঞ্চলৰ লোকসকলৰ বাবে চৰকাৰে ডিজিটেল বিশ্ববিদ্যালয় স্থাপন কৰাৰ পৰিকল্পনা কৰিছে বুলিও মন্তব্য কৰে কেন্দ্ৰীয় বিত্ত মন্ত্ৰীগৰাকীয়ে ।
বেংকিং খণ্ডৰ সন্দৰ্ভত সীতাৰমণে কয় যে, চৰকাৰে অদূৰ ভৱিষ্যতে ভাৰতত কমেও 75 টা ডিজিটেল বেংকিং গোট গঢ়ি তুলিব (Digital Banking Units) । প্ৰাকৃতিক কৃষিৰ(Natural farming) ক্ষেত্ৰত চৰকাৰে ডিজিটেল প্ৰযুক্তিৰ ব্যৱহাৰৰ দ্বাৰা উন্নত প্ৰাকৃতিক কৃষি সক্ষম কৰি তুলিছে বুলি জানিব দিয়ে বিত্তমন্ত্ৰীগৰাকীয়ে ৷ অনুষ্ঠানত বাণিজ্য আৰু উদ্যোগৰ অংশীদাৰসকলে তেওঁলোকৰ মতামত আৰু প্ৰশ্নৰ অৱতাৰণা কৰে ।