ৰহাত উদ্ধাৰ গাড়ী চালকৰ মৃতদেহ

ৰহাত উদ্ধাৰ পাণ্ডুৰ এজন গাড়ী চালকৰ মৃতদেহ ৷ গাড়ী চালকজন ভাড়া মাৰিবলৈ গৈ সন্ধানহীন হৈ আছিল ৷ চালকজনৰ মৃত্যুত শোকস্তব্ধ অঞ্চলবাসী ৷

গুৱাহাটী,25 ডিচেম্বৰ: গুৱাহাটী মহানগৰীত শোকাৱহ ঘটনা ৷ ৰহাত উদ্ধাৰ হয় পাণ্ডুৰ এজন গাড়ী চালকৰ ৷ চালকজনৰ ৰহস্যজনক মৃত্যুত এতিয়া শোকস্তব্ধ অঞ্চলবাসী।

ঘটনা অনুসৰি বৃহস্পতিবাৰে নিজৰ ডিআই বাহনেৰে ভাড়াৰ বাবে ঘৰৰ পৰা ওলাই গৈছিল পাণ্ডুৰ চম্ভু চেটাৰ্জী । তেতিয়াৰ পৰাই সন্ধানহীন হৈ আছিল গাড়ী চালক চম্ভু ৷ পৰিয়ালৰ লোকে গাড়ী চালকজনৰ সন্ধানত বহু বিচাৰ-খোচাৰ কৰে যদিও কোনো সন্ধান নাপায় চালকজনৰ ৷ এদিন ধৰি লোকজনৰ কোনো খবৰ লাভ নকৰাত চালকজনৰ পৰিয়ালে কাষ চাপে আৰক্ষীৰ ।

পৰিয়ালৰ অভিযোগৰ ভিত্তিতে আৰক্ষীয়ে আৰম্ভ কৰে অভিযান ৷ অভিযানত বাহনখনৰ GPS ট্ৰেক কৰাত ডিমাপুৰ দিশত বাহনখনৰ অৱস্থিতি পাই আৰক্ষীয়ে । কিন্তু ৰহস্যজনকভাৱে শুকুৰবাৰে ৰহাত উদ্ধাৰ হয় লোকজনৰ তেজেৰে লুতুৰি-পুতুৰি হৈ থকা মৃতদেহ ।

মৃতদেহ উদ্ধাৰৰ পাচতে অঞ্চলজুৰি সৃষ্ঠি হয় চাঞ্চল্য ৷ বৰ্তমানলৈকে এই ঘটনাৰ সৈতে কোন জড়িত জানিব পৰা হোৱা নাই জালুকবাৰী আৰক্ষীয়ে ঘটনা সন্দৰ্ভত অব্যাহত ৰাখিছে তদন্ত ৷

অন্য এক খবৰৰ বাবে: দৰিদ্ৰতাক নেওচি নগাঁৱৰ ৰাকেশ কুমাৰ ঠাকুৰৰ সাফল্য