গুৱাহাটী, ১৪ মে':মাজুলী জিলা কংগ্ৰেছৰ সভাপতি প্ৰাক্তন মন্ত্ৰী ৰাজীৱলোচন পেগুৱে বিজেপিত যোগ দিব নেকি ? কংগ্ৰেছ আৰু বিজেপি উভয় দলৰে ভিতৰচ'ৰাত সম্প্ৰতি ইয়াকে লৈ আৰম্ভ হৈছে তুমুল চৰ্চা । সদ্য সমাপ্ত নিৰ্বাচনত মাজুলী সমষ্টিত প্ৰাক্তন মুখ্যমন্ত্ৰী সৰ্বানন্দ সোণোৱালৰ হাতত প্ৰায় ৪৩ হাজাৰ ভোটত পৰাজিত হৈছিল ৰাজীৱ লোচন পেগু ।
মন কৰিবলগীয়া যে, বৃহস্পতিবাৰে মুখ্যমন্ত্ৰী ড৹ হিমন্তবিশ্ব শৰ্মাই মাজুলী ভ্ৰমণ কৰাৰ সময়তে কোনো পূৰ্ব নিৰ্দ্ধাৰিত কাৰ্যসূচী নথকা স্বত্বেও মুখ্যমন্ত্ৰীগৰাকীক সাক্ষাৎ কৰি গামোচা পিন্ধাই তেওঁক মাজুলীলৈ আদৰণি জনাইছিল কংগ্ৰেছ নেতাগৰাকীয়ে । জিলা উপায়ুক্তৰ কাৰ্যালয়ত জিলা প্ৰশাসনৰ সৈতে মুখ্যমন্ত্ৰী বৃহস্পতিবাৰে এক বৈঠকত মিলিত হৈছিল । সেই স্থানতে কংগ্ৰেছ নেতাগৰাকীয়ে সাক্ষাৎ কৰে মুখ্যমন্ত্ৰী ড৹ শৰ্মাক ।