গুৱাহাটী, 26 অক্টোবৰঃএটা ভিডিঅ'ক লৈ তোলপাৰ লাগিছে মেঘালয়ৰ ৰিভ'ই জিলাত ৷ আৰক্ষী চকীৰ ভিতৰত প্ৰৱেশ কৰি খাচী ছাত্ৰ সংগঠনৰ সদস্যই প্ৰহাৰ কৰিলে এজন আৰক্ষী বিষয়া আৰু এজন আৰক্ষী কনিষ্টবলক ৷ য়োৱা 15 অক্টোবৰত সংঘটিত হয় এই ঘটনা ৷
তথ্য অনুসৰি,মেঘালয়ৰ ৰিভ'ই জিলাৰ সুমেৰ গাঁৱত বৰপেটাৰ এজন গাড়ী চালকক প্ৰহাৰ কৰিছিল কেইজনমান যুৱকে ৷ ভুক্তভোগী গাড়ী চালক আমিৰ আলীৰ গোচৰৰ ভিত্তিত আৰক্ষীয়ে আটক কৰে এজন অভিযুক্তক ৷ কিন্তু তাৰ পাচতেই যুৱকজনক মুকলি কৰি দিয়াৰ দাবীত আৰক্ষী চকীত উপস্থিত হয় স্থানীয় খাচী ছাত্ৰ সংগঠনৰ কেইজনমান সদস্য ৷ ৰিভ'ই জিলাৰ আৰক্ষী অধীক্ষকে জনোৱা মতে সংগঠনটোৰ সভাপতি ফাৰ্ডিনেল্ড খাৰকামনিয়ে আৰক্ষী চকীৰ ভিতৰত প্ৰথমে মুখ্য কনিষ্টবল বি.বৰদলৈক শাৰীৰিকভাৱে অপদস্থ কৰে ৷ তাৰ পাচতেই ছাত্ৰ নেতাজনে প্ৰহাৰ কৰে আৰক্ষী চকীৰ ভাৰপ্ৰাপ্ত বিষয়া এল. চিংখনক ৷
ইতিমধ্যে কনিষ্টবল বি.বৰদলৈয়ে ছাত্ৰ নেতাজনৰ বিৰুদ্ধে দাখিল কৰিছে এটা গোচৰ ৷ আৰক্ষীয়ে পলাতক ছাত্ৰ নেতাজনৰ সন্ধান চলোৱাৰ লগতে প্ৰকাশ কৰিছে এখন জাননী ৷ যি লোকে অভিযুক্তজনৰ সন্ধান দিব তেখেতৰ পৰিচয় গোপনে ৰখা হ'ব বুলি জনাইছে আৰক্ষীয়ে ৷
TAGGED:
আৰক্ষীক প্ৰহাৰ ছাত্ৰনেতাৰ