গুৱাহাটী, 29 এপ্ৰিল : দুৰ্নীতিৰ অভিযোগত প্ৰশাসনিক বিষয়া এ সম্পথৰ গুৱাহাটী খোৱাপানী আৰু অনাময় পৰিষদৰ পৰিচালন (Guwahati Metropolitan Drinking Water and Sewerage Board) সঞ্চালকৰ পদৰ পৰা পদত্যাগ কৰাৰ পিছত ৰাজ্য চৰকাৰে শেহতীয়াভাৱে উপায়ুক্ত পল্লৱ গোপাল ঝাক (DC Pallava Gopal Jha) গুৱাহাটী খোৱাপানী আৰু অনাময় পৰিষদৰ পৰিচালন সঞ্চালকৰ পদত নিযুক্তি দিয়ে । লগতে জাইকাৰ ঋণেৰে নিৰ্মাণ কৰি থকা কেন্দ্ৰীয় আৰু উত্তৰ গুৱাহাটী পানী যোগান প্ৰকল্পৰো প্ৰকল্প সঞ্চালক ৰূপে পল্লৱ গোপাল ঝাক নিযুক্তি দিয়া হৈছে ।
উল্লেখ্য যে, পল্লৱ গোপাল ঝাই বৰ্তমান কামৰূপ মহানগৰ জিলাৰ উপায়ুক্ত হিচাপে কাৰ্যনিৰ্বাহ কৰি আছে । এতিয়া আকৌ দুটাকৈ গুৰুত্বপূৰ্ণ দায়িত্বত থকাৰ পিছত পল্লৱ গোপাল ঝাক আকৌ গুৱাহাটী খোৱাপানী আৰু অনাময় পৰিষদৰ পৰিচালন সঞ্চালকৰ অতিৰিক্ত দায়িত্ব দিছে । এনে পৰিপ্ৰেক্ষিতত চূড়ান্ত অনিয়ম আৰু দুৰ্নীতিত নিমজ্জিত হৈ থকা গুৱাহাটী পানী যোগান প্ৰকল্পৰ কাম নতুনকৈ নিযুক্ত হোৱা গুৱাহাটী খোৱাপানী আৰু অনাময় পৰিষদৰ পৰিচালন সঞ্চালক পল্লৱ গোপাল ঝাই কিদৰে গুৱাহাটী পানী যোগান প্ৰকল্পৰ কাম আগঢ়ায় নিয়ে সেয়া সময়হে ক'ব ৷