নাগৰিকত্ব সংশোধনী আইনৰ দুবছৰঃ বিৰোধী দলপতিৰ প্ৰতিক্ৰিয়া

নাগৰিকত্ব সংশোধনী আইনখন বাতিল কৰাৰ বাবে চৰকাৰক আহ্বান বিৰোধী দলপতিৰ ৷ এই আইনখনক অসম‌ চুক্তিৰ পৰিপন্থী বুলি আখ্যা বিৰোধী দলপতিগৰাকীৰ ৷ অসম আৰু অসমীয়াৰ বৃহৎ স্বাৰ্থৰ খাতিৰত আইনখন বাতিল কৰাৰ আহ্বান বিৰোধী দলপতিগৰাকীৰ ৷

গুৱাহাটী, ১০ ডিচেম্বৰ : বহু বিতৰ্কিত নাগৰিকত্ব সংশোধনী আইন গৃহিত হোৱা দুবছৰ(Two years of Citizenship Amendment Act) সম্পূৰ্ণ হ'ল । এই বহু চৰ্চিত আইনখনৰ সন্দৰ্ভত প্ৰতিক্ৰিয়া ব্যক্ত কৰিছে বিৰোধী দলপতি দেবব্ৰত শইকীয়া(Opposition leader Debabrata Saikia)ই ৷ আইনখনৰ সন্দৰ্ভত বিৰোধী দলপতিগৰাকীয়ে শুকুৰবাৰে কয় যে, "অসম আৰু অসমীয়া বিৰোধী নাগৰিকত্ব সংশোধনী ক’লা আইন গৃহিত হোৱাৰ আজি দুটা বছৰ অতিক্ৰম কৰিলে । বছৰ বাগৰি আছে যদিও অসম আৰু অসমীয়াক অন্ধকাৰত ৰাখি যিখন ক’লা আইন আমাৰ ওপৰত জাপি দিলে তাক কোনেও পাহৰিব নোৱাৰে ।

শইকীয়াই আইনখনৰ সন্দৰ্ভত চৰকাৰক কঠোৰ সমালোচনা কৰি কয় যে, এই আইনখনৰ বিৰুদ্ধে প্ৰতিবাদ কৰি পাঁচজনকৈ তেজাল অসমীয়া যুৱকে প্ৰাণ হেৰুওৱালে । কিন্তু চৰকাৰে আজিলৈকে এজনো ছহিদৰ ঘৰলৈ গৈ তেওঁলোকৰ শোকসন্তপ্ত পৰিয়ালবৰ্গক দেখা কৰি সান্তনা দিবলৈ সময় নাপালে ।

বিৰোধী দলপতিগৰাকীয়ে ক’লা আইনখনৰ দ্বিতীয় বাৰ্ষিকীত চৰকাৰক অনুৰোধ জনায় কয় যে, এই আইনখন অসম‌ চুক্তিৰ পৰিপন্থী আৰু এই আইনখনে অসম চুক্তিক সম্পূৰ্ণৰূপে ধ্বংস কৰি দিব ৷ সেয়ে তেওঁ চৰকাৰক অসম আৰু অসমীয়াৰ বৃহৎ স্বাৰ্থৰ বাবে নিজৰ ৰাজনৈতিক লাভালাভক আওকাণ কৰি জাতিৰ স্বাৰ্থত কৃষি আইন তিনিখনৰ দৰে নাগৰিকত্ব সংশোধনী আইনখনো বাতিল কৰাৰ বাবে আহ্বান জনায় ৷ তেওঁ লগতে ছহিদপৰিয়ালক উপযুক্ত ক্ষতিপূৰণ দিবলৈ চৰকাৰক আহ্বান জনায় ।

লগতে পঢ়ক :অসমীয়া হিন্দু আৰু থলুৱা মুছলমান অসমতে সুৰক্ষিত নহয় বুলি কিয় ক’লে মুখ্যমন্ত্ৰীয়ে ?