গুৱাহাটী,10অক্টোবৰঃ অহা ২০ অক্টোবৰৰ পৰা আৰম্ভ হ'ব ইণ্ডিয়ান ছুপাৰ লীগ চমুকৈ আই এছ এলৰ ষষ্ঠ সংস্কৰণ । ইতিমধ্যেই প্ৰতিটো দলেই কঠোৰ অনুশীলন চলাই আছে। সেই অনুসৰি নৰ্থ ইষ্ট ইউনাইটেড এফ চি দলো নামি পৰিছে অনুশীলনত । বৃহস্পতিবাৰে মহানগৰীৰ জালুকবাৰীস্থিত হোটেল ৰেডিচন ব্লু'ত সংবাদ মাধ্যমৰে মুখামুখি হৈ দলটোৰ প্ৰস্তুতিৰ কথা ক'লে প্ৰশিক্ষক আৰু খেলুৱৈসকলে ।
অহা ২১ অক্টোবৰত বাংগালুৰু এফ চিৰে মুখামুখি হ'ব নৰ্থ ইষ্ট ইউনাইটেড এফ চি । তাৰ বাবে ইতিমধ্যেই অনুশীলন চলাই আছে দলটোৱে । দলটোৰ মুখ্য প্ৰশিক্ষক ৰবাৰ্ট জাৰ্নীয়ে ক'লে পূৰ্বতকৈ অধিক উন্নত হৈছে খেলুৱৈসকলৰ প্ৰদৰ্শন । যাৰ বাবে আই এছ এলত এইবাৰ নৰ্থ ইষ্ট ইউনাইটেড এফ চিয়ে উন্নতমানৰ খেল প্ৰদৰ্শন কৰিব বুলি আশাবাদী মুখ্য প্ৰশিক্ষকগৰাকী ।
ইফালে নৰ্থ ইষ্ট ইউনাইটেডত অন্তৰ্ভুক্ত হৈছে অসমৰ প্ৰতিভাৱান যুৱ খেলুৱৈ ৰাকেশ প্ৰধান । ইপিনে ৰাকেশ প্ৰধানৰ খেলৰ শৈলী দেখি অভিভূত দলটোৰ প্ৰশিক্ষক আৰু সতীৰ্থ খেলুৱৈসকল । মুঠৰ ওপৰত এইবাৰ শ্ৰেষ্ঠত্বৰ অৰ্জনৰ বাবে নিজৰ সকলো উজাৰি দিব নৰ্থ ইষ্ট ইউনাইটেড এফ চিয়ে । উল্লেখ্য যে বুধবাৰে ভাৰতীয় দলৰ লগত এক বন্ধুত্বপূৰ্ণ মেচত অৱতীৰ্ণ হৈছিল নৰ্থ ইষ্ট ইউনাইটেড এফ চি দলটো । এই মেচৰ জৰিয়তে খেলুৱৈসকলৰ আত্মবিশ্বাস যথেষ্ট বৃদ্ধি পাইছে বুলি সংবাদ মাধ্যমৰ আগত ব্যক্ত কৰে প্ৰশিক্ষক চন্দিপ নন্দীয়ে । আনহাতে নৰ্থ ইষ্ট দলটোৰ শাৰীৰিক প্ৰশিক্ষণৰ ক্ষেত্ৰত এইবাৰ বিশেষ গুৰুত্ব দিয়া হৈছে বুলিও জানিবলৈ দিয়ে দলটোৰ শাৰীৰিক প্ৰশিক্ষক জোজে কাৰ্লছ বাৰছোৱে ।