বৃহৎ নদীবান্ধ কোনো প্ৰকাৰে হ'বলৈ নিদিওঁঃ অখিল গগৈ

খানাপাৰাস্থিত পঞ্চতাৰকা হোটেল তাজ ভিভাণ্টাত উত্তৰ–পূবৰ শক্তি মন্ত্ৰীৰে কেন্দ্ৰীয় শক্তি মন্ত্ৰীৰ বৈঠক ৷ বৈঠকৰ সময়তে কৃষক মুক্তি সংগ্ৰাম সমিতিয়ে সাব্যস্ত কৰে তীব্ৰ প্ৰতিবাদ৷

গুৱাহাটী, 27 আগষ্টঃ মহানগৰীৰ খানাপাৰাস্থিত তাজ ভিভাণ্টা হোটেলত উত্তৰ–পূবৰ শক্তি মন্ত্ৰীৰে কেন্দ্ৰীয় শক্তিমন্ত্ৰী ৰাজকুমাৰ সিঙৰ বৈঠক। জলবিদ্যুৎ উৎপাদন সন্দৰ্ভত অনুষ্ঠিত কৰা হয় এই বৈঠক । বৈঠকৰ সময়তে কৃষক মুক্তি সংগ্ৰাম সমিতিয়ে হোটেল তাজ ভিভান্তাৰ সন্মুখত চৰকাৰ বিৰোধী শ্লোগানেৰে উত্তাল প্ৰতিবাদ সাব্যস্ত কৰে । প্ৰতিবাদৰ প্ৰতি লক্ষ্য ৰাখি হোটেল চৌহদত আৰক্ষীয়ে কটকটীয়া নিৰাপত্তা ব্যৱস্থা গঢ়ি তোলে । উল্লেখ্য যে, বৃহৎ নদীবান্ধৰ বিৰুদ্ধে স্মাৰকপত্ৰ দিবলৈ গৈছিল কৃষক মুক্তি সংগ্ৰাম সমিতিৰ নেতা অখিল গগৈ ।

হোটেল তাজ ভিভাণ্টাৰ সন্মুখত অখিল গগৈক বাধা প্ৰদান কৰাৰ লগতে তাজ ভিভাণ্টাৰ সলনি প্ৰশাসনে নিৰ্ধাৰণ কৰি দিয়া ঠাইত কৃষক মুক্তিক প্ৰতিবাদ কৰিবলৈ আহ্বান জনায় আৰক্ষী আয়ুক্ত দীপক কুমাৰে । আনহাতে বৃহৎ নদীবান্ধ কোনো প্ৰকাৰে হ'বলৈ নিদিওঁ বুলিও উল্লেখ কৰে কৃষক নেতা গৰাকীয়ে । চৰকাৰে বৃহৎ নদীবান্ধ বনাবলৈ যি পৰিকল্পনা কৰিছে ,সেই পৰিকল্পনা প্ৰত্যাহাৰ নকৰিলে ৰাজ্যজুৰি কৃষক মুক্তি সংগ্ৰাম সমিতিয়ে বৃহৎ আন্দোলন গঢ়ি তোলাৰ হুংকাৰ দিয়ে ।