গুৱাহাটী,1 এপ্ৰিল: দ্বিতীয় পৰ্যায়ৰ ভোটগ্ৰহণ প্ৰক্ৰিয়া অনুষ্ঠিত হৈ থকা ৰাজ্যৰ ৩৯ টা সমষ্টিৰ ১০,৫৯২ টা ভোটকেন্দ্ৰৰ ৫০ শতাংশতেই ৱেব-কাষ্টিঙৰ ব্যৱস্থা কৰা হৈছে । এই কেন্দ্ৰসমূহৰ ভিতৰত স্পৰ্শকাতৰ আৰু অতি স্পৰ্শকাতৰ ভোটকেন্দ্ৰ আছে । ৱেব কাষ্টিঙৰ ব্যৱস্থা থকা ভোটকেন্দ্ৰসমূহৰ ভোটগ্ৰহণ প্ৰক্ৰিয়া গুৱাহাটীৰ জনতা ভৱনৰ পৰা নিৰীক্ষণ কৰি থকা হৈছে । জনতা ভৱনৰ মুখ্য নিৰ্বাচন বিষয়াৰ কাৰ্যালয়ত স্থাপন কৰা নিয়ন্ত্রণ কক্ষৰ পৰাই পোনপটীয়াকৈ ৱেব কাষ্টিঙৰ ব্যৱস্থা থকা ভোটকেন্দ্ৰ সমূহৰ সকলো দিশ তদাৰক কৰি থকা হৈছে । মুখ্য নিৰ্বাচনী বিষয়া নীতিন খাড়ে আৰু যুটীয়া মুখ্য নিৰ্বাচনী বিষয়া এল এন চহৰীয়াকে ধৰি আন বিষয়াসকলে নিয়ন্ত্রণ কক্ষৰ পৰা সকলো দিশ নিৰীক্ষণ কৰি আছে ।
লগতে পঢ়ক :মিছা কথা শুনিব খুজিলে মোডীৰ ভাষণ শুনক: ৰাহুল গান্ধী
উল্লেখ্য যে, আজি ৰাজ্যৰ ৩৯ টা সমষ্টিত অনুষ্ঠিত হৈ আছে দ্বিতীয় পৰ্যায়ৰ নিৰ্বাচন । দ্বিতীয় পৰ্যায়ৰ নিৰ্বাচনত অৱতীৰ্ণ হোৱা ৩৪৫ গৰাকী প্ৰাৰ্থীৰ ভিতৰত ৩১৯ জন পুৰুষ আৰু ২৬ গৰাকী মহিলা প্ৰাৰ্থী । আনহাতে মুঠ ভোটাৰৰ সংখ্যা হৈছে ৭৩,৪৪,৬৩১ গৰাকী । ইয়াৰ ভিতৰত ৩৭,৩৪,৫৩৭ জন পুৰুষ, ৩৬,০৯,৯৫৯ গৰাকী মহিলা আৰু ১৩৫ গৰাকী তৃতীয় লিংগৰ ভোটাৰ ।
এইবাৰ ক'ভিডৰ প্ৰতি লক্ষ্য ৰাখি ভোটকেন্দ্ৰৰ সংখ্যা কিছু বৃদ্ধি কৰা হৈছে । দ্বিতীয় পৰ্যায়ৰ নিৰ্বাচনত অতিৰিক্তভাৱে আছে ১,৫৯৪ টা ভোটকেন্দ্ৰ । আনহাতে মহিলাৰ দ্বাৰা পৰিচালিত হৈছে ৫৫৬ টা ভোটকেন্দ্ৰ । দ্বিতীয় পৰ্যায়ৰ নিৰ্বাচনত নিয়োজিত হৈছে ৪২,৩৬৮ গৰাকী চৰকাৰী বিষয়া-কৰ্মচাৰী । উল্লেখযোগ্য যে, দ্বিতীয় পৰ্যায়ৰ নিৰ্বাচনত দিনৰ ১১ বজালৈ ২৭.৪৫ শতাংশ ভোটদান হোৱাৰ তথ্য সদৰী কৰিছে মুখ্য নিৰ্বাচনী বিষয়াৰ কাৰ্যালয়ে ।
লগতে পঢ়ক :পুনৰ সাংবাদিকক আক্ৰমণৰ লক্ষ্য আজমলৰ
