মহানগৰীৰ ৰাজপথত মহিলাৰ চাফাই অভিযান

স্বাধীনতা দিৱস উপলক্ষে ৰাজপথ-শ্বহীদ বেদীত মহিলাৰ এই চাফাই অভিযান ৷

গুৱাহাটী,15 আগষ্ট: দেশৰ 73তম স্বাধীনতা দিৱসৰ লগত সংগতি ৰাখি মহানগৰীৰ "সৃষ্টি" নামৰ মহিলা সমবায় সমিতিখনে আজি এক ব্যতিক্ৰমী কাৰ্যসূচী পালন কৰে । প্ৰায় ডেৰ শতাধিক মহিলাৰে গঠিত গনেশগুৰি আৰ পি ৰোডৰ ১৯ নং ৱাৰ্ডৰ এই মহিলা সমিতিখনৰ অৰ্ধ শতাধিক সদস্যাই আজি পুৱাৰে পৰা হাতে হাতে ঝাড়ু, দা, কটাৰী আদি লৈ নামি পৰে চাফাই অভিযানত । 'সৃষ্টি'ৰ সদস্যাসকলে গনেশগুৰিৰ বি কে টাৱাৰৰ পৰা গনেশ মন্দিৰলৈকে এই চাফাই অভিযান চলাই ৷ গনেশ মন্দিৰৰ সমুখত থকা শ্বহীদ বেদীও পৰিষ্কাৰ কৰে মহিলাৰ দলটোৱে ৷ উল্লেখযোগ্যযে সুদীৰ্ঘ সময় ধৰি পৰিষ্কাৰ নকৰাৰ ফলত হাবি জংঘলেৰে ভৰি পৰা এই শ্বহীদ বেদীটোৰ চৌপাশ মহিলাসকলে পৰিষ্কাৰ কৰি তোলে ৷ স্বাধীনতা দিৱসৰ দিনটোতে এইদৰে চাফাই অভিযান চলোৱা মহিলাৰ দলটোৰ ৰাইজে একমুখে শলাগ লৈছে ৷