গুৱাহাটী, 10 ফেব্ৰুৱাৰীঃ গুৱাহাটী বিশ্ববিদ্যালয়ৰ দূৰ আৰু মুক্ত শিক্ষা প্রতিষ্ঠান চমুকৈ আইডলৰ বিভিন্ন কেলেংকাৰী কথা ইতিমধ্যেই উন্মোচিত হৈছে । শেহতীয়াকৈ ফাদিল হৈছিল স্বীকৃতি আৰু অনুমোদন অবিহনেই গুৱাহাটী বিশ্ববিদ্যালয়ৰ দূৰ আৰু মুক্ত শিক্ষা প্রতিষ্ঠানটোৱে অবৈধভাৱে মুঠ 21 টা বিষয়ৰ পাঠ্যক্রম চলাই যোৱাৰ এক বৃহৎ কেলেংকাৰীৰ কথা ৷
গুৱাহাটী বিশ্ববিদ্যালয় আইডল কেলেংকাৰী তাৰ পাচতেই এই বিষয়ে বিশ্ববিদ্যালয়খনৰ উপাচার্য ড৹ প্রতাপ জ্যোতি সন্দিকৈয়ে ঘোষণা কৰিছিল তদন্তৰ ৷ যাৰ বাবে গঠন কৰা হৈছিল দুখনকৈ তদন্ত কমিটি ৷ এই বৃহৎ কেলেংকাৰী সন্দৰ্ভত কমিটি দুখনে চলাই আছে তদন্ত প্ৰক্ৰিয়া । ইয়াৰে এখন গুৱাহাটী বিশ্ববিদ্যালয়ৰ অধ্যাপকৰে গঠিত 7 জনীয়া কমিটি আৰু আনখন হৈছে প্ৰাক্তন মুখ্য ন্যায়াধীশ আফটাৱ হুছেইন শইকীয়াৰ নেতৃত্বত গঠিত এজনীয়া কমিটি।
গুৱাহাটী বিশ্ববিদ্যালয়ৰ অন্তৰ্গত দূৰ আৰু মুক্ত শিক্ষা প্রতিষ্ঠান 7 জনীয়া কমিটিটোৱে ঘটনাটোৰ তদন্ত কৰি এমাহৰ ভিতৰতে প্ৰতিবেদন দাখিল কৰাৰ কথা আছিল । কিন্তু এমাহ উকলি যোৱাৰ পিছতো প্ৰতিবেদন ৰাজহুৱা নকৰাত এতিয়া তীব্ৰ প্ৰতিক্ৰিয়া সৃষ্টি হৈছে চৌদিশে ।
অৱশ্যে এই সন্দৰ্ভত গুৱাহাটী বিশ্ববিদ্যালয়ৰ উপাচাৰ্য ড৹ প্ৰতাপ জ্যোতি সন্দিকৈয়ে ইটিভি ভাৰতৰ আগত কয় যে, প্ৰথমে সাতজনীয়া কমিটি খনে প্ৰতিবেদনটো মুখ্য ন্যায়াধীশৰ হাতত দাখিল কৰিব লাগিব । আইনী দিশসমূহ চালি জাৰি চোৱাৰ পাচতহে ৰাজহুৱা কৰিব পাৰিব প্ৰতিবেদন ।
উল্লেখযোগ্য যে, যোৱা কিছুদিন পূৰ্বে তদন্ত ক্ষীপ্ৰগতিত কৰাৰ লগতে বিষয়টো পুংখানুপুংখভাৱে তদন্ত কৰাৰ দাবীত আছু আৰু ছাত্ৰ মুক্তি সংগ্ৰাম সমিতিয়ে তদন্ত আয়োগৰ ব্যক্তিগত সচিবৰ হাতত দুখনকৈ আবেদন জনাইছিল । মুঠ ৭৩,৯১২ গৰাকী শিক্ষাৰ্থীৰ ভৱিষ্যতলৈ অনিশ্চয়তা কঢ়িয়াই অনা এই কেলেংকাৰীত জড়িত সকলক অতি সোনকালে চিনাক্ত কৰি উচিত শাস্তি বিহাৰ দাবী তুলিছে বিভিন্ন মহলে ।
