গুৱাহাটী,৯ অক্টোবৰ : দুদিনৰ জেৰাৰ পাছত দেওবাৰে পুনৰ দিছপুৰ থানাত হাজিৰ হ'ব লাগিব ডাঃ নভনীল বৰুৱা । আজিও প্ৰায় দহ ঘণ্টা জেৰা কৰাৰ পাছত জি এন আৰ চি হাস্পতালৰ চিকিৎসক ডাঃ নভনীল বৰুৱাক স্বাস্থ্য পৰীক্ষা সম্পন্ন কৰি ঘৰলৈ যাব দিয়া হয় । শুকুৰবাৰে প্ৰায় দহ ঘণ্টা জেৰা কৰাৰ পাছত আজি পুনৰ দিনজোৰা জেৰা চলোৱা হয় জ্যেষ্ঠ চিকিৎসক গৰাকীক ।
পুনৰ দেওবাৰে তেওঁ হাজিৰ হ’ব লাগিব দিছপুৰ থানাত । পুৱা ১০ বজাত ডাঃ বৰুৱাক জেৰাৰ বাবে পুনৰ হাজিৰ হোৱাৰ নিৰ্দেশ দিয়া হৈছে । শুকুৰবাৰে প্ৰথম ৰাজকন্যা বৰুৱা কাণ্ডৰ সন্দৰ্ভত দিছপুৰ আৰক্ষীয়ে জেৰা কৰিছিল ডাঃ বৰুৱাক । প্ৰথম দিনাৰ জেৰাৰ অন্তত স্বাস্থ্য পৰীক্ষা কৰি তেওঁক যাবলৈ দিয়া হৈছিল ঘৰলৈ ।
দ্বিতীয় দিনাও অনুৰূপ ধৰণেই দীৰ্ঘসময় জেৰাৰ অন্তত স্বাস্থ্য পৰীক্ষা কৰি ঘৰলৈ যোৱাৰ অনুমতি দিয়ে আৰক্ষীয়ে । উল্লেখ্য যে, ১ অক্টোবৰৰ নিশা ১.৩০ বজাত আঠজনকৈ শ্ৰমিকক সুৰামত্ত হৈ বাহনেৰে মহতীয়াই নিয়া বিতৰ্কিত মডেল ৰাজকন্যা বৰুৱাক ৰক্ষণাবেক্ষণ দিয়াৰ অভিযোগ উত্থাপিত হৈছে ডাঃ নভনীল বৰুৱাৰ বিৰুদ্ধে ।