গুৱাহাটী, ১৫ নৱেম্বৰ :বৰ্তমানৰ মুখ্যমন্ত্ৰী তথা প্ৰাক্তন বিত্তমন্ত্ৰী ড৹ হিমন্ত বিশ্ব শৰ্মা(Himanta Biswa Sarma)ই প্ৰশাসনীয় ব্যৱস্থাটো সৰলীকৃত কৰাৰ উদ্দেশ্যেই বিত্তমন্ত্ৰী হৈ থকা সময়ত ঘোষণা কৰিছিল যে এতিয়াৰে পৰা Fixation of Ceiling (FOC) চমুকৈ চিলিং ব্যৱস্থাটো প্ৰত্যাহাৰ কৰা হ’ব । কিয়নো এই চিলিং ব্যৱস্থাৰ ৰঙা ফিটাৰ মেৰপেচত পৰি বহু ঠিকাদাৰে প্ৰাপ্য ধন আৰু বহু চৰকাৰী কৰ্মচাৰীয়ে সময়মতে দৰমহা আদায় নাপায় । যিহেতু দিছপুৰৰ কোষাগাৰৰ পৰা কেন্দ্ৰীভূতভাৱে এই চিলিং মোকলাই দিয়া হয় ।
বিত্তমন্ত্ৰীৰ এই ঘোষণাৰ পিছত যাৱতীয় নিৰ্দেশনাও জাৰি কৰা হৈছিল । কিন্তু পৰিতাপৰ বিষয় যে এতিয়াও ৰঙা ফিটাৰ মোহ এৰিব নোৱৰা বিত্ত বিভাগে এই নিৰ্দেশনা কাৰ্যকৰীয়েই নকৰিলে । যাৰ ফলস্বৰূপে চিলিং নোপোৱাৰ বাবে বিগত দুমাহে দৰমহা লাভ কৰা নাই বহু ঠিকাভিত্তিক আৰু অস্থায়ী চৰকাৰী কৰ্মচাৰীয়ে । একমাত্ৰ বিত্ত বিভাগৰ অৱহেলাৰ বাবেই আজিকোপতি চিলিং ব্যৱস্থা প্ৰত্যাহাৰ নহ'ল ।