বিৰোধী দলপতিৰ স্বীকৃতি হেৰুৱালে দেৱব্ৰত শইকীয়াই

অসম বিধানসভাৰ বিৰোধী দলপতিৰ আসনৰ হেৰুৱাব লগা হল বিধায়ক দেৱব্ৰত শইকীয়াই । কংগ্ৰেছৰ বিধায়কৰ সংখ্যা হয়গৈ 20 গৰাকীলৈ হ্ৰাস পোৱা বাবে এই পদ হেৰুৱালে শইকীয়াই ৷

গুৱাহাটী, 28 ডিচেম্বৰ :অসম বিধানসভাৰ বিৰোধী দলপতিৰ আসনৰ পৰা আতৰিব লগীয়া হ'ল বিধায়ক দেৱব্ৰত শইকীয়া । সাংবিধানিকভাবেই এতিয়াৰে পৰা আৰু দেৱব্ৰত শইকীয়া বিৰোধী দলপতি হৈ নাথাকিব । কিয়নো সংসদীয় বিধি অনুসৰি বিধানসভাৰ মুঠ আসনৰ ভিতৰত কমেও ছভাগৰ এভাগ আসন লাভ কৰা দলৰ পৰাহে নিযুক্তি দিয়া হয় বিৰোধী দলপতিগৰাকীক ।

সেই অনুসৰি কেবিনেট মৰ্যাদাৰ বিৰোধী দলপতিৰ আসনত বহিবলৈ হ'লে বিধায়কৰ সংখ্যা হ'ব লাগিব কমেও 21 গৰাকী । 2016 চনৰ বিধানসভা নিৰ্বাচনত কংগ্ৰেছে লাভ কৰিছিল 26 খন আসন । গতিকে সাংবিধানিক নিয়ম অনুসৰি বিৰোধী দলপতিৰ আসনত অধিষ্ঠিত হৈছিল বিধায়ক দেৱব্ৰত শইকীয়া । কিন্তু পৰৱৰ্তী সময়ত ডাঃ মানছিং ৰংপিয়ে বিজেপিত যোগ দি বিধায়ক পদ ত্যাগ কৰে । তাৰ পিছৰ পৰ্যায়ত শিৱসাগৰৰ বিধায়ক তথা বিধানসভাৰ প্ৰাক্তন অধ্যক্ষ প্ৰণৱ গগৈৰ বিয়োগৰ ফলত কংগ্ৰেছৰ বিধায়কৰ সংখ্যা 24 গৰাকীলৈ হ্ৰাস পায় ।

আনহাতে, জনিয়াৰ বিধায়ক আব্দুল খালেক লোকসভালৈ নিৰ্বাচিত হোৱাৰ ফলত কংগ্ৰেছে বিধানসভাত আৰু এখন আসন হেৰুৱাব লগীয়া হয় । শেহতীয়াকৈ প্ৰাক্তন মুখ্যমন্ত্ৰী তৰুণ গগৈৰ বিয়োগৰ ফলত কংগ্ৰেছৰ আসনৰ সংখ্যা কমি আহি 22 গৰাকী হয় । আনহাতে, শেহতীয়াকৈ বিজেপিত যোগ দিয়াৰ লক্ষ্যৰে অজন্তা নেওগ আৰু ৰাজদ্বীপ গোৱালাই কংগ্ৰেছৰ বিধায়ক পদ ত্যাগ কৰাত কংগ্ৰেছৰ বিধায়কৰ সংখ্যা হয়গৈ 20 গৰাকী । ফলত স্বাভাৱিকতে বিৰোধী দলপতিৰ স্বীকৃতি হেৰুৱাব লগীয়া হয় দেৱব্ৰত শইকীয়াই ।

লগতে পঢ়ক :সোমবাৰৰ পৰা আৰম্ভ বিধানসভাৰ শীতকালীন অধিৱেশন