অসম বিধানসভাৰ 13 শতাংশ বিধায়কৰ আছে অপৰাধজনিত গোচৰ

আছাম ইলেকচন ৱাটছ আৰু এছ’চিয়েশ্বন ফৰ ডেম’ক্ৰেটিক ৰিফৰ্মে শেহতীয়াকৈ প্ৰকাশ কৰা এক প্ৰতিবেদনত প্ৰকাশ পাইছে এই তথ্য ৷

নিউজ ডেস্ক, 18 জানুৱাৰী :দেশৰ মুখ্য নিৰ্বাচন আয়ুক্তৰ লগতে নিৰ্বাচন আয়ুক্তৰ তিনিজনীয়া নিৰ্বাচনী আয়োগৰ দলে অসমত উপস্থিত হোৱাৰ দিনটোতে প্ৰকাশ পাইছে অসমৰ জনপ্ৰতিনিধিৰ অপৰাধৰ মাত্ৰাৰ এক বিশেষ প্ৰতিবেদন ৷ যিটো সময়ত নিৰ্বাচন আয়োগে জনপ্ৰতিনিধিসকলৰ অপৰাধৰ মাত্ৰা তিনিটাকৈ স্তৰত ৰাজহুৱা কৰি বিজ্ঞাপন প্ৰকাশ কৰিবলৈ নিৰ্দেশনা জাৰি কৰিছে সেই সময়ত অসমৰ দুটা সংস্থাই উমৈহতীয়াকৈ প্ৰকাশ কৰিছে এই প্ৰতিবেদনখন ৷

আছাম ইলেকচন ৱাটছ আৰু এছ’চিয়েশ্বন ফৰ ডেম’ক্ৰেটিক ৰিফৰ্ম নামৰ সংস্থা দুটাই একেলগে প্ৰকাশ কৰিছে অসম বিধানসভাৰ নিৰ্বাচিত প্ৰতিনিধিৰ অপৰাধৰ তালিকাখন ৷ কেন্দ্ৰীয় নিৰ্বাচন আয়োগৰ ৱেবচাইট আৰু বিধায়কসকলে প্ৰদান কৰা এফিডেভিটৰ পৰাই এই তালিকাখন প্ৰস্তুত কৰিছে সংস্থা দুটাই ৷

তালিকাখনত মুঠ 119 গৰাকী বিধায়কৰ ভিতৰত 15 গৰাকী (13 শতাংশ) বিধায়ক অপৰাধজনিত গোচৰত জড়িত হৈ আছে ৷ ইয়াৰ ভিতৰত 11 গৰাকী গুৰুতৰ অভিযোগত জড়িত হৈ থকাৰ লগতে 3 গৰাকীৰ বিৰুদ্ধে হত্যাৰ গোচৰ ৰুজু হৈ আছে আৰু এগৰাকী বিধায়কৰ বিৰুদ্ধে হত্যাৰ ষড়যন্ত্ৰ কৰাৰ গোচৰ ৰুজু হৈ আছে ৷ দল হিচাপত সৰ্বাধিকসংখ্যক (12শতাংশ) বিজেপি বিধায়কৰ বিৰুদ্ধে অপৰাধজনিত গোচৰ ৰুজু হৈ আছে ৷

বিজেপি বিধায়কঃ

• আমিনুল হক লস্কৰ, সোনাই বিধানসভা সমষ্টি; মুঠ গোচৰ 14টা,গুৰুতৰ গোচৰ 5 টা
• কুশল দুৱৰী, থাওৰা বিধানসভা সমষ্টি; মুঠ গোচৰ 8 টা গুৰুতৰ,গোচৰ 5 টা
• নৱ কুমাৰ দলে, ঢকুৱাখানা বিধানসভা সমষ্টি; মুঠ গোচৰ 4টা,গুৰুতৰ গোচৰ 3 টা
• ৰমাকান্ত দেউৰী, মৰিগাঁও বিধানসভা সমষ্টি; মুঠ গোচৰ 5টা,গুৰুতৰ গোচৰ 3 টা
• নাৰায়ন ডেকা, বৰক্ষেত্ৰী বিধানসভা সমষ্টি; মুঠ গোচৰ 2টা,গুৰুতৰ গোচৰ 1 টা
• দীপক কুমাৰ ৰাভা, দুধনৈ বিধানসভা সমষ্টি; মুঠ গোচৰ 3 টা,গুৰুতৰ গোচৰ 1 টা
• শিলাদিত্য দেৱ, হোজাই বিধানসভা সমষ্টি; মুঠ গোচৰ 8 টা

কংগ্ৰেছ বিধায়কঃ

• কমলাক্ষ দে’ পুৰকায়স্থ, উত্তৰ কৰিমগঞ্জ বিধানসভা সমষ্টি; মুঠ গোচৰ 4 টা গুৰুতৰ গোচৰ 1 টা
• দেবব্ৰত শইকীয়া, নাজিৰা বিধানসভা সমষ্টি; মুঠ গোচৰ 3 টা,গুৰুতৰ গোচৰ 1 টা
• আব্দুল কালাম ৰচিদ, পূৱ গোৱালপাৰা বিধানসভা সমষ্টি; মুঠ গোচৰ 2 টা,গুৰুতৰ গোচৰ 1 টা
• নুৰুল হুদা, ৰূপহীহাট বিধানসভা সমষ্টি; মুঠ গোচৰ 6 টা
• জামালুদ্দিন আহমেদ, বদৰপুৰ বিধানসভা সমষ্টি; মুঠ গোচৰ 2টা

এআইইউডিএফ বিধায়কঃ

• অনন্ত কুমাৰ মালো, দক্ষিণ অভয়াপুৰী বিধানসভা সমষ্টি; মুঠ গোচৰ 4 টা,গুৰুতৰ গোচৰ 3 টা
• হাফিজ ৰফিকুল ইছলাম, জনীয়া বিধানসভা সমষ্টি; মুঠ গোচৰ 6 টা,গুৰুতৰ গোচৰ 2 টা

নিৰ্দলীয় বিধায়কঃ

• ভূৱন পেগু, জোনাই বিধানসভা সমষ্টি; মুঠ গোচৰ 6 টা

2006 ত অসম বিধানসভাৰ মুঠ 7 গৰাকী বিধায়কৰ বিৰুদ্ধে অপৰাধজনিত গোচৰ ৰুজু হৈছিল, যিটো 2011ত 13 গৰাকীলৈ বৃদ্ধি পাইছিল ৷ একেদৰেই 2016ত অপৰাধজনিত গোচৰ থকা বিধায়কৰ সংখ্যা 15 গৰাকীলৈ বৃদ্ধি পায় ৷ 2006ত অপৰাধজনিত গোচৰত জড়িত থকা বিধায়ক মুঠ 126ৰ ভিতৰত 6শতাংশ আছিল যিটো 11ত 4 শতাংশ বৃদ্ধি হৈ 10 শতাংশ হৈছিল আৰু 2016ত 2 শতাংশ বৃদ্ধি হৈ মুঠ 12 শতাংশ হয় ৷ দল হিচাপত চাবলৈ গ’লে বিজেপিৰ 7 গৰাকী (12 শতাংশ) কংগ্ৰেছৰ 5 গৰাকী (25 শতাংশ), এআইডিইউএফৰ 2 গৰাকী (14 শতাংশ) বিধায়কৰ বিৰুদ্ধে অপৰাধজনিত গোচৰ ৰুজু হৈ আছে ৷ আনহাতে বিজেপি বিধায়ক আমিনুল হক লস্কৰৰ বিৰুদ্ধে সৰ্বাধিকসংখ্যক 14 টা অপৰাধজনিত গোচৰ ৰুজু হৈ আছে ৷

দুয়োটা সংস্থাই প্ৰকাশ কৰা তালিকাখনত বিগত তিনিটাকৈ বিধানসভা নিৰ্বাচনৰ নিৰ্বাচিত জনপ্ৰতিনিধি (বিধায়ক)ৰ অপৰাধমূলক কাৰ্যকলাপ আৰু তেওঁলোকৰ বিৰুদ্ধে ৰুজু হৈ থকা গোচৰৰ তালিকাখন প্ৰকাশ কৰিছে ৷ অসম বিধানসভাৰ মুঠ 126 খন আসনৰ ভিতৰত সদ্যহতে পাঁচখন আসন খালী হৈ আছে ৷ ৰঙাপৰা, পাটাছাৰকুছি, গোলাঘাট, লক্ষীপুৰ, শিৱসাগৰ আৰু তিতাবৰ সমষ্টি বৰ্তমানে বিধায়ক শূন্য হৈ আছে ৷ যাৰ ফলত তালিকাখন প্ৰস্তুত কৰোতে 119 গৰাকী বিধায়কৰ অপৰাধ, বিত্তীয় তথা অন্যান্য তথ্যৰ পৰীক্ষা কৰা হৈছে ৷ আনহাতে বিজেপি বিধায়ক মানসিং ৰংপিৰ অপৰিপূৰ্ণ তথ্যৰ বাবে তালিকাখন প্ৰস্তুত কৰোতে তেওঁৰ তথ্য প্ৰদান কৰিব নোৱাৰিলে সংস্থা দুটাই ৷

লগতে পঢ়ক :সোমবাৰে অসমলৈ আহিব দেশৰ মুখ্য নিৰ্বাচন আয়ুক্ত সুনীল অৰোৰা