গুৱাহাটী, 6 জুলাই : ভাৰতীয় আদৰ্শবাদী মহান নেতা ড৹ শ্যামা প্ৰসাদ মুখাৰ্জীক তেখেতৰ 109সংখ্যক জন্মজয়ন্তীত সমগ্ৰ দেশে সশ্ৰদ্ধ সোঁৱৰণেৰে সন্মান প্ৰদান কৰে ৷ দেশৰ প্ৰধানমন্ত্ৰীকে ধৰি গৃহমন্ত্ৰী আৰু বিজেপিৰ ৰাষ্ট্ৰীয় সভাপতিয়ে ড৹ শ্যামা প্ৰসাদ মুখাৰ্জীৰ জন্মজয়ন্তীত টুইট কৰি তেখেতক সোঁৱৰণ কৰে ৷ নিস্বাৰ্থভাৱে ৰাষ্ট্ৰৰ হকে কাম কৰা মহান আদৰ্শবাদী নেতাগৰাকীক তেখেতৰ জন্মজয়ন্তীত দেশজুৰি স্মৰণ কৰা হৈছে ।
তেখেতৰ জন্মজয়ন্তী উপলক্ষে অসমৰ মুখ্যমন্ত্ৰী সৰ্বানন্দ সোণোৱালে গুৱাহাটীস্থিত তেখেতৰ বাসভৱনত ড৹ শ্যামাপ্ৰসাদ মুখাৰ্জীলৈ পুস্পাঞ্জলি অৰ্পণ কৰে । দেশৰ একতা আৰু অখণ্ডতাৰ ক্ষেত্ৰত তেখেতৰ অতুলনীয় অৱদানৰ কথা শ্ৰদ্ধাৰে স্মৰণ কৰে মুখ্যমন্ত্ৰীগৰাকীয়ে ।
109সংখ্যক জন্মজয়ন্তীত সশ্ৰদ্ধ সোঁৱৰণ ড৹ শ্যামা প্ৰসাদ মুখাৰ্জীক দেশৰ প্ৰধানমন্ত্ৰী নৰেন্দ্ৰ মোডীয়ে টুইট কৰি ড৹ শ্যামা প্ৰসাদ মুখাৰ্জীৰ অৱদানক স্মৰণ কৰে ৷ ভাৰতৰাষ্ট্ৰৰ বাবে অনুকৰণীয় অৱদান আগবঢ়োৱা এগৰাকী প্ৰকৃত দেশভক্ত আছিল ড৹ শ্যামা প্ৰসাদ মুখাৰ্জী ৷ ভাৰতৰ একতাৰ বাবে সাহসী পদক্ষেপ গ্ৰহণ কৰা শ্যামা প্ৰসাদ মুখাৰ্জীৰ চিন্তা আৰু আদৰ্শই লাখ-লাখ ভাৰতীয়ক শক্তি প্ৰদান কৰে বুলি টুইট কৰে প্ৰধানমন্ত্ৰীগৰাকীয়ে ৷
দেশৰ গৃহমন্ত্ৰী অমিত শ্বাহেও শ্যামা প্ৰসাদ মুখাৰ্জীক স্মৰণ কৰে ৷ গৃহমন্ত্ৰীগৰাকীয়ে টুইট কৰি কয় যে, ড৹ শ্যামা প্ৰসাদ মুখাৰ্জীৰ ৰূপত দেশবাসীয়ে এগৰাকী এনেকুৱা দুৰদৰ্শী নেতা লাভ কৰিছিল যিয়ে, ভাৰতৰ মুখ্য সমস্যাসমূহৰ স্থায়ী সমাধানৰ বাবে জীৱন পৰ্যন্ত সংঘৰ্ষ কৰিছিল ৷ সাংস্কৃতিক ৰাষ্ট্ৰীয়তাবাদৰ ওপৰত আধাৰিত জনসংঘ আৰু আজিৰ ভাৰতীয় জনতা পাৰ্টী ড৹ মুখাৰ্জীৰে দুৰদৰ্শিতাৰ পৰিমান বুলি টুইট কৰে কেন্দ্ৰীয় গৃহমন্ত্ৰী অমিত শ্বাহে ৷
ড৹ শ্যামা প্ৰসাদ মুখাৰ্জীৰ জন্মজয়ন্তীত বিজেপিৰ ৰাষ্ট্ৰীয় অধ্যক্ষ জয়প্ৰকাশ নড্ডায়ো তেওঁক স্মৰণ কৰে ৷ এই টুইট কৰি ড৹ শ্যামা প্ৰসাদ মুখাৰ্জীক স্মৰণেৰে নড্ডাই লিখে যে, ৰাষ্ট্ৰবাদ আৰু সেৱা ভাৱক আধাৰ হিচাপে লৈ ভাৰতীয় জনসংঘৰ স্থাপনা কৰা পৰম শ্ৰদ্ধেয় ড৹ শ্যামা প্ৰসাদ মুখাৰ্জীক তেওঁৰ জন্মজয়ন্তীত কোটি কোটি প্ৰণাম ৷ সমতামুলক সমাজ আৰু অখণ্ড ভাৰত সংকল্পৰ সাৰ আত্মনিৰ্ভৰ ভাৰত নিৰ্মাণত অত্যন্ত অনুকৰণীয় বুলি টুইট কৰে নড্ডাই ৷
উল্লেখ্য যে, জম্ম-কাশ্মীৰৰ পৰা অনুচ্ছেদ 370 প্ৰত্যাহাৰ কৰাৰ কথা সৰ্বোপ্ৰথমে উল্লেখ কৰিছিল ড৹ শ্যামা প্ৰসাদ মুখাৰ্জীয়ে ৷ ড৹ মুখাৰ্জীৰ জন্ম, 1901 চনত কলকাতা আজিৰ দিনতে হৈছিল ৷ ড৹ শ্যামা প্ৰসাদ মুখাৰ্জীয়ে জৱাহৰলাল নেহৰুৰ কেবিনেটত উদ্যোগ আৰু যোগান মন্ত্ৰী হিচাপে দায়িত্ব পালন কৰিছিল ৷ নেহৰু-লিয়াকত চুক্তিৰ বিৰোধিতা কৰি 1950 চনৰ 8 এপ্ৰিলত কেচি নেওগিৰ সৈতে একেলগে মুখাৰ্জীয়ে কেবিনেটৰ পৰা পদত্যাগ কৰিছিল আৰু ৰাষ্ট্ৰীয় স্বয়ংসেৱক সংঘৰ সহযোগত 1951 চনত 21 অক্টোৱৰ ভাৰতীয় জনসংঘ প্ৰতিষ্ঠা কৰিছিল আৰু দলটোৰ প্ৰথম সভাপতি নিৰ্বাচিত হৈছিল ৷ 1952 চনৰ সাধাৰণ নিৰ্বাচনত মুখাৰ্জীৰ নেতৃত্বত জনসংঘই তিনিখন আসনত জয়লাভ কৰিবলৈ সক্ষম হৈছিল ৷ 1939 চনত মুখাৰ্জীয়ে হিন্দু মহাসভাত যোগদান কৰি একে বছৰতে দলটোৰ কাৰ্যকৰী সভাপতি নিৰ্বাচিত হৈছিল ৷ মুখাৰ্জীয়ে জম্মু-কাশ্মীৰক প্ৰদান কৰা বিশেষ অধিকাৰৰ তীব্ৰ বিৰোধিতা কৰিছিল আৰু এখন দেশত দুখন সংবিধান, দুগৰাকী প্ৰধান আৰু দুখন নিচান নচলিব বুলি কৈছিল আৰু অনুচ্ছেদ 370 প্ৰত্যাহাৰৰ দাবী উত্থাপন কৰিছিল ৷
ড৹ শ্যামা প্ৰসাদ মুখাৰ্জী এক হিন্দু ব্ৰাহ্মণ পৰিয়ালত জন্মগ্ৰহণ কৰিছিল আৰু তেওঁৰ পিতৃ আছিল কলকাতা উচ্চ ন্যায়ালয় তথা কলকাতা বিশ্ববিদ্যালয়ৰ উপাচাৰ্য আশুতোষ মুখাৰ্জী ৷ 1921 চনত ইংৰাজী বিষয়ত প্ৰেসিডেন্সী কলেজৰ পৰা প্ৰথম শ্ৰেণীৰ প্ৰথম স্থানত স্নাতক ডিগ্ৰী লাভ কৰিছিল ৷ মুখাৰ্জীয়ে 1923 চনত বাংলা ভাষাত নিজৰ স্নাতকোত্তৰ উত্তীৰ্ণ হৈছিল আৰু তাতো তেওঁ প্ৰথম শ্ৰেণীৰ প্ৰথম স্থান লাভ কৰিছিল ৷ 1924 চনত তেওঁ বিএল ডিগ্ৰী লাভ কৰিছিল ৷ 1933 চনত কলকাতা বিশ্ববিদ্যালয়ত মাত্ৰ 33 বছৰ বয়সতে উপাচাৰ্যৰ পদত অধিস্থিত হৈছিল আৰু এইটো পদত অধিস্থিত হোৱা মুখাৰ্জীয়ে আছিল কনিষ্ঠ উপাচাৰ্য ৷ 1938 চনৰ 26 নৱেম্বৰত কলকাতা বিশ্ববিদ্যালয়ৰ পৰা সন্মানীয় ডি. লিট ডিগ্ৰী লাভ কৰিছিল ড৹ মুখাৰ্জীয়ে ৷ ড৹ মুখাৰ্জীৰ দিনতে কলকাতা বিশ্ববিদ্যালয়ৰ সমাৱৰ্তন সমাৰোহত ৰবীন্দ্ৰনাথ ঠাকুৰে প্ৰথমবাৰৰ বাবে বাংলা ভাষাত ভাষণ প্ৰদান কৰিছিল ৷
1953 চনত জম্মু-কাশ্মীৰ আৰক্ষীৰ জিম্মাত থকা অৱস্থাত ৰহস্যজনকভাৱে মৃত্যু হৈছিল ড৹ শ্যামা প্ৰসাদ মুখাৰ্জীৰ ৷ 2004 চনত অটল বিহাৰী বাজপেয়ীয়ে ড৹ মুখাৰ্জীৰ মৃত্যুক নেহৰুৰ নেতৃত্বতে হত্যা কৰা হৈছিল বুলি উল্লেখ কৰিছিল ৷ এইগৰাকী মহান ভাৰতীয় চিন্তাবাদী নেতাক তেখেতৰ জন্মজয়ন্তীত ইটিভি ভাৰতৰ পৰাও সশ্ৰদ্ধ প্ৰণাম ৷
