গুৱাহাটী, ২০ নৱেম্বৰ : ৰাজ্য শিক্ষা ব্যৱস্থাত নতুন শিক্ষা নীতি ২০২০ কাৰ্যকৰি কৰাৰ বাবে তৎপৰ হৈছে অসম চৰকাৰ । গুৱাহাটী মেডিকেল কলেজ হাস্পতালৰ প্ৰেক্ষাগৃহত অনুষ্ঠিত উত্তৰ-পূৱ শিক্ষা সমাৰোহত অংশলৈ এই কথা ঘোষণা মুখ্যমন্ত্ৰী ড৹ হিমন্ত বিশ্ব শৰ্মাৰ । ২৫ নৱেম্বৰত বঙাইগাঁও কেবিনেট বৈঠকত ৰাজ্য চৰকাৰে শিক্ষা ব্যৱস্থা যুগান্তকাৰী প্ৰদক্ষেপ গ্ৰহণ কৰিব বুলি কয় তেওঁ ।
নতুন শিক্ষা নীতি ২০২০(New education policy 2020)ক লৈ অনুষ্ঠিত সমাৰোহত ঘোষণা কৰে অসমৰ ৫ খনকৈ মহাবিদ্যালয়ক বিশ্ববিদ্যালয় পৰ্যায়লৈ উন্নীতকৰণৰ কথা । সেই মতে উত্তৰ-লখিমপুৰ মহাবিদ্যালয় নগাঁও মহাবিদ্যালয়, শিৱসাগৰ মহাবিদ্যালয়, জেবি মহাবিদ্যালয় আৰু সন্দিকৈ মহাবিদ্যালয়ক বিশ্ববিদ্যালয়লৈ উন্নীতকৰণ কৰা হ’ব।
এই মতে অহা তিনি বছৰৰ ভিতৰত উন্নীতকৰণৰ কাম সম্পূর্ণ কৰাৰ পৰিকল্পনা কৰিছে চৰকাৰে । গুৱাহাটীৰ জিএমচিএইছ প্ৰেক্ষাগৃহ(GMCH Auditorium)ত ৰাষ্ট্ৰীয় শিক্ষা নীতিক লৈ শনিবাৰৰে পৰা দুদিনীয়া কাৰ্যসূচীৰে আৰম্ভ হোৱা প্ৰথমখন শিক্ষা সমাৰোহত এই ঘোষণা মুখ্যমন্ত্ৰী ড৹ হিমন্ত বিশ্ব শৰ্মাৰ ।
তেওঁ কয় যে, নতুন ভাৰত গঢ়াত উৎসাহ জগাব নতুন শিক্ষা নীতিয়ে । ভাৰতৰ সভ্যতাক লৈ সকলোৱে গৌৰৱ কৰে, কালৰ সোঁতত বহু সভ্যতাৰ বিলুপ্তি ঘটিল । বিপৰীতে চিৰ প্ৰৱাহমান হৈ আছে ছয় হাজাৰ বছৰ পুৰণি ভাৰতীয় সভ্যতা । ভাৰতীয় সভ্যতাৰ মূল ছাবিকাঠিয়ে হ'ল জ্ঞান আৰু প্ৰজ্ঞাৰ সাধনা ।
তেওঁ পুনৰ কয়, ৰাষ্ট্ৰীয় শিক্ষা নীতিৰ অন্যতম অংশীদাৰ হৈছে শিক্ষাৰ্থী । শিক্ষাৰ্থীৰ প্ৰয়োজন কি সেয়া জনাটো অত্যন্ত জৰুৰী । এইক্ষেত্ৰত গৱেষণা অব্যাহত ৰাখিছে বিদ্যা ভাৰতীয়ে । বিদ্যা ভাৰতীৰ বাবে প্ৰাক-প্ৰাথমিক আৰু অংগনৱাড়ী কেন্দ্ৰ সংযোজিত হৈছে LPS ত । কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে কয় যে, এতিয়া অসমীয়া ভাষাতো JEE পৰীক্ষা অনুষ্ঠিত হ'ব । JEE এতিয়া পৰা 13 টা ভাৰতীয় ভাষাত অনুষ্ঠিত হয় আৰু আগলৈ ভাষাৰ সংখ্যা বৃদ্ধি পাব বুলি তেওঁ জানিবলৈ দিয়ে ।
লগতে পঢ়ক :Smart policing in Assam : মুখ্যমন্ত্ৰীয়ে নিৰ্দেশ দিয়াৰ লগে লগেই আৰক্ষীয়ে ল’লে পদক্ষেপ
