গুৱাহাটী, ২৪ মে': প্ৰত্যেক বছৰ বানে ৰাজ্যবাসীক জুৰুলা কৰাৰ লগতে ৰাজ্যখনৰ বিস্তৰ ক্ষতি সাধন কৰি আহিছে (Flood in Assam)। এইবাৰো ভয়াৱহ বানৰ কৱলত পৰিছে ৰাজ্য । কিন্তু বানবিধ্বস্ত ৰাজ্যখনক সকাহ দিয়াৰ ক্ষেত্রত কেন্দ্ৰই সদায়ে কৃপণালি কৰি আহিছে । কেন্দ্ৰীয় চৰকাৰে অসমক ৰাজ্যিক দুর্যোগ সাহায্য পুঁজি শিতানত কমকৈ হ'লেও নিয়মীয়াকৈ পুঁজি দি আহিছে যদিও ৰাষ্ট্ৰীয় দুর্যোগ সাহায্য পুঁজিৰ শিতানত পুঁজি মোকলাই দিয়া নাই (Central fund for Assam during disaster)।
কেন্দ্ৰীয় গৃহ মন্ত্রণালয়ে অসমক ২০২১-২২ বিত্তীয় বৰ্ষত ৰাষ্ট্ৰীয় দুর্যোগ সাহায্য পুঁজি শিতানত ফুটাকড়িও দিয়া নাই (National disaster relief fund for Assam)। ২০২২-২৩ চনতো ৰাষ্ট্ৰীয় দুর্যোগ সাহায্য পুঁজি শিতানত অসমক পুঁজি দিবৰ বাবে আনুষ্ঠানিক অনুমোদন দিয়া নাই । কেন্দ্ৰীয় চৰকাৰৰ গৃহ মন্ত্রণালয়ৰ তথ্যত অসমক ৰাষ্ট্ৰীয় দুর্যোগ সাহায্য পুঁজিৰ শিতানত সাহায্য দিয়াৰ ক্ষেত্ৰত কৰা বঞ্চনাৰ দিশটো উন্মোচিত হৈছে ।
উল্লেখ্য যে, ভাৰতৰ সংবিধানৰ ২৮০ নং অনুচ্ছেদৰ অধীনত কেন্দ্ৰীয় চৰকাৰে ৰাজ্যসমূহক দুর্যোগ সাহায্য পুঁজি আৱণ্টন দিয়ে । বিত্ত আয়োগৰ পৰামৰ্শৰ ভিত্তিত কেন্দ্ৰই ৰাজ্যসমূহক দুর্যোগ সাহায্য পুঁজি দিবলৈ বাধ্য । সংবিধানৰ নিৰ্দিষ্ট অনুচ্ছেদৰ ভিত্তিত ৰাজ্যসমূহক কেন্দ্রই সহায় কৰে । তেনে ব্যৱস্থাৰ ভিত্তিতেই অসমক কেন্দ্ৰীয় চৰকাৰৰ অংশৰ পৰা ৰাজ্যিক দুর্যোগ সাহায্য পুঁজি মোকলাই দি আহিছে ।
গৃহ মন্ত্রণালয়ৰ তথ্য মতে, কেন্দ্ৰই ৰাজ্যিক দুর্যোগ সাহায্য পুঁজি শিতানত অসমক ২০১৮-১৯ চনত ৪৭৮.৮০ কোটি টকা, ২০১৯-২০ চনত ৫০৩.১০ কোটি টকা, ২০২০-২১ চনত ৭৭২ কোটি টকা আৰু ২০২১-২২ চনত ৬১৭.৬০ কোটি টকা মোকলাই দিছে । ২০২০-২১ চনৰ তুলনাত অসমক ২০২১-২২ চনত প্রায় ১৬০ কোটি টকা কমকৈ মোকলাই দিয়া হৈছে ।
অসমত বানপ্ৰৱণ এলেকা বেছি যদিও অন্য বহু ৰাজ্যৰ তুলনাত ৰাজ্যিক দুর্যোগ সাহায্য শিতানত কমকৈ টকা দিয়া হয় । বছৰে গড়ে ৫ লাখ হেক্টৰ কৃষিভূমি নষ্ট হোৱাৰ লগতে পথ, গৃহকে ধৰি শ শ কোটি টকাৰ আন্তঃগাঁথনি ধ্বংস হয় বানত । তাৰ পাছতো দেশৰ কম বান প্ৰৱণ এলেকাতকৈ অসম ৰাজ্যিক দুর্যোগ সাহায্য পুঁজি শিতানত কমকৈ ধন দি থকা হৈছে ।