নিউজ ডেস্ক,10 জানুৱাৰীঃ 10 জানুৱাৰী 2020 ৰ পৰা সমগ্ৰ দেশতে বলৱৎ হ’ল নাগৰিকত্ব সংশোধনী আইন 2019 ৷ কেন্দ্ৰীয় গৃহ মন্ত্ৰণালয়ে এক ৰাজপত্ৰিত অধিসূচনা জাৰী কৰি প্ৰকাশ কৰিলে এই কথা ৷ প্ৰকাশিত ৰাজপত্ৰিত উল্লেখ আছে- কেন্দ্ৰীয় চৰকাৰ, নাগৰিকত্ব (সংশোধন) অধিনিয়ম, 2019 (2019 ৰ 47 ) ৰ ধাৰা 1 ৰ উপধাৰা (2) ৰ দ্বাৰা প্ৰাপ্ত ক্ষমতা প্ৰয়োগ কৰি 10 জানুৱাৰী, 2020 ক নিৰ্ধাৰণ কৰি উক্ত অধিনিয়ম কাৰ্যকৰী কৰা হ’ব ৷
উল্লেখ্য যে,নাগৰিকত্ব সংশোধনী আইনৰ পুনৰীক্ষণ আবেদনক লৈ উচ্চতম ন্যায়ালয়ত প্ৰথমটো শুনানি সম্পন্ন হোৱাৰ পাচত 22 জানুৱাৰীৰ আগত গোচৰৰ পৰৱৰ্তী শুনানিৰ আগেয়ে উচ্চতম ন্যায়ালয়ক উত্তৰ দিব লাগিব কেন্দ্ৰ চৰকাৰে ৷ বিলখন নাকচ কৰাৰ দাবীৰে দাখিল কৰা 59 খন পুনৰীক্ষণ আবেদন পৰীক্ষা কৰি এই ৰায়দান প্ৰদান কৰিছিল উচ্চতম ন্যায়ালয়ে ৷
অৱশ্যে আইনখনৰ সন্দৰ্ভত অন্তৱৰ্তীকালীন স্থগিতাদেশ ঘোষণা কৰিবলৈ উচ্চতম ন্যায়ালয়ে অস্বীকাৰ কৰিছিল ৷ মুখ্য ন্যায়াধীশ এছ এ বোবডেৰ আদালতে প্ৰদান কৰিছিল এই নিৰ্দেশ ৷ নাগৰিকত্ব সংশোধনী আইনৰ স্থগিতাদেশ প্ৰদান কৰাৰ দাবীৰে বৃহৎ সংখ্যক লোকে দাখিল কৰা সকলো পুনৰীক্ষণ আবেদন সংলগ্ন কৰি এই ৰায়দান দিছিল উচ্চতম ন্যায়ালয়ৰ ৷ ন্যায়ালয় উল্লেখ কৰিছিল যে, বৰ্তমানলৈকে নাগৰিকত্ব সংশোধনী আইন কাৰ্যকৰী হোৱা নাই যাৰ বাবে ইয়াত স্থগিতাদেশ জাৰী কৰিব পৰা নাযাব ৷