গুৱাহাটী, 20 ফেব্ৰুৱাৰী : পৌৰসভা নিৰ্বাচন (Assam municipal election 2022) অনুষ্ঠিত হ'বলগীয়া 977 খন পৌৰ ৱাৰ্ডৰ ভিতৰত 56 খনত ইতিমধ্যে বিজেপি আৰু মিত্ৰদলৰ প্ৰাৰ্থীয়ে বিনা প্ৰতিদ্বন্দ্বিতাৰে নিৰ্বাচিত হৈছে ৷ লগতে উত্তৰ গুৱাহাটী, লামডিং আৰু চতিয়া পৌৰসভা গঠন কৰিব পৰাকৈ বিজেপি প্ৰাৰ্থীয়ে বিজয় সাব্যস্ত কৰিছে । উত্তৰ গুৱাহাটী পৌৰসভাৰ দহখন ৱাৰ্ডৰ ভিতৰত সাতখনত, লামডিঙত তেৰখনৰ ভিতৰত সাতখনত আৰু চতিয়া পৌৰসভাত দহখনৰ ভিতৰত সাতখনত বিনাপ্ৰতিদ্বন্দ্বিতাৰে বিজেপি প্ৰাৰ্থী বিজয়ী হৈ পৌৰসভা গঠন কৰিব পৰাকৈ সংখ্যাগৰিষ্ঠতা অর্জন কৰিছে ।
উল্লেখ যে, বিজেপিয়ে মুঠ 883 খন আসনত প্ৰাৰ্থী দিয়াৰ বিপৰীতে মিত্ৰ দলে 92 খন আসনত প্ৰতিদ্বন্দ্বিতা আগবঢ়াইছে । এই সন্দৰ্ভত বিজেপিৰ ৰাজ্যিক মুখপাত্ৰ ৰঞ্জীৱ কুমাৰ শৰ্মাই কয় যে, উত্তৰ গুৱাহাটী, চতিয়া আৰু লামডিং পৌৰসভা বিজেপি দলে বিনা প্ৰতিদ্বন্দ্বিতাৰে ইতিমধ্যে গঠন কৰিবলৈ সক্ষম হোৱা ঘটনাই ৰাজ্যৰ ৰাজনীতিত কংগ্ৰেছ আৰু অন্যান্য বিৰোধী দল ক্ৰমান্বয়ে অপ্ৰাসংগিক হৈ পৰাকে সূচাইছে ।
লগতে কয় যে, যিকেইখন ৱাৰ্ডত কংগ্ৰেছ দলে প্ৰাৰ্থী থিয় কৰাইছে সেইকেইখনৰো অধিকাংশ প্ৰার্থীৰ যুঁজৰ মানসিকতা ৰাজনৈতিক ক্ষেত্ৰখনত পৰিলক্ষিত হোৱা নাই । ফলত বিৰোধী দলটোৱে নিৰ্বাচনী ৰণভূমিৰ পৰাই পলাই-পত্ৰং দিয়া দেখা গৈছে বুলি উল্লেখ কৰে ৰঞ্জীৱ কুমাৰ শৰ্মাই (BJP Spokesperson Ranjiv Kumar Sarma on Municipal election) ৷