দশম শ্ৰেণী পৰ্যন্ত হিন্দী ভাষা বাধ্যতামূলক কৰাৰ বিৰোধিতা অসম সাহিত্য সভাৰ

কেন্দ্ৰীয় গৃহমন্ত্ৰীয়ে হিন্দীভাষা বাধ্যতামূলক কৰাৰ সন্দৰ্ভত তীব্ৰ বিৰোধ কৰিছে অসম সাহিত্য সভাই (Assam sahitya sabha against hindi being compulsory subject) ৷ জানো আহক এই বিষয়ত কি হ’ব সাহিত্য সভাৰ পদক্ষেপ ৷

গুৱাহাটী, ৯ এপ্ৰিল : অসম তথা উত্তৰ পূৰ্বাঞ্চলৰ বিদ্যালয়সমূহত দশমমান পৰ্যন্ত হিন্দীশিক্ষা বাধ্যতামূলক কৰিবৰ বাবে চৰকাৰী ভাষা সম্পৰ্কীয় সংসদীয় সমিতিত ঘোষণা কৰা সিদ্ধান্তক তীব্ৰ বিৰোধিতা কৰিছে অসম সাহিত্য সভাই (Assam sahitya sabha) ৷ এক বিজ্ঞপ্তিত সভাৰ প্ৰধান সম্পাদক যাদব চন্দ্ৰ শৰ্মাই কয় যে, কেন্দ্ৰীয় গৃহমন্ত্ৰীয়ে হিন্দীভাষা বাধ্যতামূলক কৰাৰ পৰিৱৰ্তে অসমীয়াকে ধৰি অন্যান্য খিলঞ্জীয়া ভাষাসমূহৰ প্ৰসাৰ আৰু বিকাশৰ বাবে ব্যৱস্থা ল’ব লাগিছিল ৷

উল্লেখ্য, হিন্দী ভাষাৰ অধ্যয়ন ব্যাধতামূলক (hindi being compulsory subject) কৰাত উত্তৰ পূৰ্বাঞ্চলৰ খিলঞ্জীয়া ভাষাসমূহ আৰু অঞ্চলটোৰ সংযোগী ভাষা হিচাপে অসমীয়া ভাষাৰ ভৱিষ্যত সন্দিহান হৈ পৰিব ৷ উল্লেখ্য যে বিগত বৰ্ষসমূহত অসম সাহিত্য সভাই উত্তৰ পূৰ্বাঞ্চলৰ খিলঞ্জীয়া ভাষাসমূহৰ প্ৰচাৰ, বিকাশ আৰু বিস্তৃতিৰ বাবে ইংৰাজী মাধ্যম আৰু চিবিএছ ই বিদ্যালয়সমূহত অসমীয়াকে ধৰি খিলঞ্জীয়া ভাষাৰ অধ্যয়ন বাধ্যতামূলক কৰিবৰ বাবে দাবী জনাই আহিছিল যদিও এই ক্ষেত্ৰত চৰকাৰী পক্ষই তিলমানো সদিচ্ছা প্ৰদৰ্শন কৰা নাই ৷

সাহিত্য সভাই স্পষ্টকৈ মত প্ৰকাশ কৰিছে যে, অসমীয়া আৰু খিলঞ্জীয়া ভাষাসমূহৰ প্ৰতি সন্মান প্ৰদৰ্শন কৰি দশম শ্ৰেণী পৰ্যন্ত হিন্দীভাষাৰ অধ্যয়ন বাধ্যতামূলক কৰাৰ সিদ্ধান্ত বাতিল কৰিব লাগে ৷ উল্লেখ্য যে উত্তৰ পূৰ্বাঞ্চলৰ বাদে অন্যান্য ৰাজ্যসমূহত এনে ব্যৱস্থাৰ পৰা বিৰত ৰখাৰ হেতুকে উত্তৰ পূৰ্বাঞ্চল বাসীয়ে সন্দেহৰ চকুৰে চাইছে ৷

লগতে পঢ়ক :হিন্দী বাধ্যতামূলক কৰাৰ সিদ্ধান্তৰ বিৰোধিতা আছু-কৃষক মুক্তিৰ