আৰম্ভ হ'ল উচ্চতৰ মাধ্যমিক চূড়ান্ত বৰ্ষৰ পৰীক্ষা

আৰম্ভ হ'ল অসম উচ্চতৰ মাধ্যমিক শিক্ষা সংসদৰ দ্বাৰা পৰিচালিত উচ্চতৰ মাধ্যমিক চূড়ান্ত বৰ্ষৰ পৰীক্ষা ৷ 2020 বৰ্ষৰ উচ্চতৰ মাধ্যমিক চূড়ান্ত বৰ্ষৰ পৰীক্ষাত উচ্চতৰ মাধ্যমিকৰ তিনিওটা শাখাত অৱতীৰ্ণ হৈছে সৰ্বমুঠ 2,34,809 গৰাকীকৈ শিক্ষাৰ্থী ৷

নিউজ ডেস্ক, 12 ফেব্ৰুৱাৰীঃআজিৰে পৰা ৰাজ্যত আৰম্ভ হ'ল উচ্চতৰ মাধ্যমিক চূড়ান্ত বৰ্ষৰ পৰীক্ষা ৷ উচ্চতৰ মাধ্যমিক কলা, বিজ্ঞান আৰু বাণিজ্য শাখাত ৰাজ্যত সৰ্বমুঠ 2,34,809 গৰাকী শিক্ষাৰ্থীয়ে পৰীক্ষাত অৱতীৰ্ণ হৈছে ৷ ৰাজ্যৰ বিভিন্ন প্ৰান্তৰ সৰ্বমুঠ 772টা পৰীক্ষাকেন্দ্ৰত অনুষ্ঠিত হৈছে পৰীক্ষা ৷ ইয়াৰ উপৰিও অতিকে দুৰ্গম অঞ্চলত থকা শিক্ষাৰ্থীৰ বাবে 20টাকৈ বিশেষ পৰীক্ষাকেন্দ্ৰও চলিত বৰ্ষৰ স্থাপন কৰিছে অসম উচ্চতৰ মাধ্যমিক শিক্ষা সংসদে ৷ অহা মাৰ্চ মাহৰ 14 তাৰিখলৈ অনুষ্ঠিত হ'ব পৰীক্ষা ৷ ইতিমধ্যে পৰীক্ষা কেন্দ্ৰৰ 100 মিটাৰ এলেকাত জিলা প্ৰশাসনে জাৰী কৰিছে 144 ধাৰা ৷ ৰাজ্যৰ 25টাকৈ সংবেদনশীল পৰীক্ষাকেন্দ্ৰত 23টাকৈ জামাৰ স্থাপন কৰিছে শিক্ষা সংসদে ৷

চলিত বৰ্ষত কলা শাখাত সৰ্বাধিক 1,175,175 গৰাকী শিক্ষাৰ্থীৰ বিপৰীতে বিজ্ঞান শাখাত 40,588 গৰাকী আৰু বাণিজ্য শাখাত 18,178 গৰাকী শিক্ষাৰ্থীৰ লগতে 868 গৰাকীকৈ শিক্ষাৰ্থী অৱতীৰ্ণ হৈছে বৃত্তিমূখী শাখাত ৷ ইতিমধ্যে পৰীক্ষাকেন্দ্ৰ সমূহত সংস্থাপন কৰা হৈছে চিচিটিভি কেমেৰাকে ধৰি পৰিস্থিতি নিয়ন্ত্ৰণৰ বাবে নিয়োগ কৰা হৈছে আৰক্ষীকে ধৰি অৰ্ধসামৰিক বাহিনীৰ দল ৷ ৰাতিপুৱা 9 বজাৰ পৰা পৰীক্ষা আৰম্ভ হোৱাৰ লগতে আবেলি 1:30 বজাৰ পৰাও পৰীক্ষা অনুষ্ঠিত হ'ব ৷

ইতিমধ্যে পৰীক্ষা কেন্দ্ৰৰ বাহিৰত শিক্ষাৰ্থীসকলৰ অভিভাৱকৰ লগতে অন্যান্য সকলৰ উপস্থিতি দেখা পৰিলক্ষিত হৈছে ৷ পৰীক্ষাৰ্থীসকলৰ ৰাজ্যৰ মুখ্যমন্ত্ৰী সৰ্বানন্দ সোণোৱাল, ছাত্ৰ সংগঠনৰ লগতে অন্যান্য অনুষ্ঠান-প্ৰতিষ্ঠানৰ উপৰিও বিভিন্নজনে শুভেচ্ছাবাণী প্ৰদান কৰে ৷