3 বজাৰ শীৰ্ষ 10 বাতৰি

3 বজাৰ শীৰ্ষ 10 বাতৰি

বিগত 24 ঘণ্টাত ৰাজ্যত কৰ'ণাত আক্ৰান্ত হয় প্ৰায় 276 গৰাকী ব্যক্তি ৷ বিপৰীতে আৰোগ্য লাভ কৰে 365 গৰাকীয়ে ৷ কামৰূপ(ম), কামৰূপ(গ্ৰাম্য) আৰু বৰপেটাত ক'ভিড আক্ৰান্তৰ সংখ্যা বৃদ্ধি পাইছে ৷

ৰাজ্যত পেট্ৰ’ল আৰু ডিজেলৰ মূল্য হ্ৰাস পোৱাক লৈ আনন্দিত সাধাৰণ ৰাইজ ৷ অসমত পেট্ৰ’লত 7 টকা আৰু ডিজেলত 12 টকাকৈ হ্ৰাস পাইছে ৷

কিমান ভয়াৱহ দৰিদ্ৰতা(Poverty) ? দৰিদ্ৰতাই কিমান তললৈ নিব পাৰে এজন লোকক? এটা চাকৰি আৰু অকণমান আশ্ৰয়ৰ বিনিময়ত নিজ শৰীৰৰ অমূল্য অংগ দান কৰিবলগীয়া হৈছে এজন লোকে ৷ কিন্তু মূল্যৱান সম্পদৰ বিনিময়ত তেওঁ লাভ কৰিলে প্ৰতাৰণা ৷

শান্তিৰ বাৰ্তা প্ৰেৰণক লক্ষ্য হিচাপে লৈ কোকৰাঝাৰত আন্তৰাষ্ট্ৰীয় কবি সন্মিলনৰ যো-জা ৷ উপস্থিত থাকিব আমেৰিকা, ইংলেণ্ড, বাংলাদেশ, নেপাল আদিকে কৰি বিভিন্ন দেশৰ কবি-মহাকবিসকল ৷

গুৱাহাটী ষ্টেচনৰ বৈদ্যুতিকৰণ সম্পূৰ্ণ হোৱাৰ লগে লগে উত্তৰ-পূৱৰ ৰাজধানী এক্সপ্ৰেছ আৰু তেজছ ৰাজধানী এক্সপ্ৰেছৰ দৰে ৰে’লসমূহ এতিয়া গুৱাহাটীৰ পৰা ৰাষ্ট্ৰীয় ৰাজধানীৰ লগতে মুম্বাই, চেন্নাই, কলকাতা আদিৰ দৰে অন্যান্য চহৰলৈ বৈদ্যুতিক ট্ৰেক্সনত চলিব পাৰিব ।

এখন ৰাজ্য এখন ৰাজধানীৰ দাবীৰে অন্ধ্ৰ প্ৰদেশত অব্যাহত আছে কৃষকৰ 'মহা পদযাত্ৰা' । অন্ধ্ৰ প্ৰদেশ চৰকাৰে ৰাজ্যখনৰ তিনিখন ৰাজধানী গঠনৰ বিষয়ে ঘোষণা কৰাৰ পাচতে ৰাজ্যখনত প্ৰতিবাদৰ জুই জ্বলিছে । অমৰাৱতীকে একমাত্ৰ ৰাজধানী হিচাপে ৰখাৰ দাবী জনাইছে কৃষকসকলে ।

ডিফু আৰু সাপেখাতীত লক্ষাধিক টকাৰ চোৰাং মূল্যৱান কাঠ জব্দ ৷ ডিফুত বন বিভাগ আৰু আৰক্ষীয়ে চলোৱা যুটীয়া অভিযানত 9 টা চোৰাং কাঠ ব্যৱসায়ীক আটক হয় ৷ আনহাতে, চোৰাং কাঠ ব্যৱসায়ৰ সৈতে জড়িত ব্যৱসায়ী পলাই যাবলৈ সক্ষম হয় ৷

চোৰৰ কোপদৃষ্টিৰ পৰা সাৰি নাযায় ধৰ্মীয় উপাসনাথলীসমূহ । মঙলবাৰে পুৱতি নিশা ডিব্ৰুগড়ৰ নাহৰকটীয়াস্থিত কালী মন্দিৰত চোৰে চলালে অভিযান । পিছে চুৰিকাণ্ড সংঘটিত কৰাৰ সমগ্ৰ দৃশ্য বন্দী হ'ল চিচিটিভিত । পৰিণতিস্বৰূপে ৰঙাঘৰৰ আলহী হ’ল গভাইত চোৰ ।

জোনাইৰ প্ৰতিটো কালী মন্দিৰ(Kali Temple)ত কালী পূজা(Kali Puja) আৰু দীপাৱলী(Diwali) উদযাপন ৷ পুৱাৰে পৰা কালী মন্দিৰসমূহত অসংখ্য ভক্তৰ সমাগম ৷ মন্দিৰত নিশাৰ ভাগত চলিব ছাগলী, হাঁহ আদিৰ বলি-বিধান ।

মঙলবাৰে পুৱাৰ ভাগত ওৰাং ৰাষ্ট্ৰীয় উদ্যান(Orang National Park)ৰ ৰামকোং(Ramkong) বন শিবিৰৰ সমীপত মৃত অৱস্থাত উদ্ধাৰ হয় এটা ঢেকীয়াপতীয়া বাঘ(Bengal Tiger) ৷ 3 ফুট ওখ আৰু 5.3 ফুট দীঘল পূৰ্ণ বয়স্ক বাঘটো আন এটা বাঘৰ সৈতে হোৱা সংঘৰ্ষৰ ফলত মৃত্যু হোৱা বুলি নিশ্চিত কৰে ঘটনাস্থলীত উপস্থিত থকা পশু চিকিৎসকৰ দলটোৱে ৷