আজিৰে পৰা চলাচল নিউ দিল্লী-ডিব্ৰুগড় সংযোগী বিশেষ ৰাজধানী ট্ৰেইন

আজিৰে পৰা নিউ দিল্লী-ডিব্ৰুগড় সংযোগী বিশেষ ৰাজধানী ট্ৰেইনৰ চলাচল হ'ব ৷ সপ্তাহত দুদিনকৈ বগীবিল দলঙৰ ওপৰেৰে চলিব নিউ দিল্লীমুখী ৰাজধানী এক্সপ্ৰেছ ।

ডিব্ৰুগড়, 12 অক্টোবৰ : সপ্তাহত দুদিনকৈ বগীবিল দলঙৰ ওপৰেৰে চলিব নিউ দিল্লীমুখী ৰাজধানী এক্সপ্ৰেছ । ইয়াৰোপৰি, উত্তৰ-পূব সীমান্ত ৰেলৱে' উত্তৰ পূৰ্বাঞ্চলৰ জনসাধাৰণৰ বাবে কেইখনমান বিশেষ ৰেল চলাচলৰ ব্যৱস্থা কৰা হৈছে । সেই অনুসৰি সোমবাৰৰ পৰা ডিব্ৰুগড়-নিউ দিল্লীলৈ বিশেষ ৰাজধানী এক্সপ্রেছ যাত্ৰা আৰম্ভ কৰা হৈছে ৷

প্ৰথমবাৰৰ বাবে সপ্তাহত দুদিনকৈ বগীবিল দলঙৰ ওপৰেৰে ডিব্ৰুগড়ৰ পৰা নিউ দিল্লীলৈ ৰাওনা হ’ব লগা বিশেষ ৰাজধানী এক্সপ্রেছখন লক্ষীমপুৰ, ৰঙাপৰা, ৰঙিয়া আৰু নিউ বঙাইগাঁও হৈ ৰাওনা হ’ব । একেদৰে নিউ দিল্লীৰ পৰা ডিব্ৰুগড় অভিমুখেও একেটা পথেৰে সপ্তাহত দুদিনকৈ এই বিশেষ ৰাজধানী এক্সপ্ৰেছখন চলাচল কৰিব ।

ডিব্ৰুগড় জংছন

উল্লেখ্য যে, এই দ্বি-সাপ্তাহিক ৰেলখন বাতানুকূল দবাযুক্ত হ'ব । ইফালে অহা 14 অক্টোবৰৰ পৰা ডিব্ৰুগড়ৰ পৰা নিউ দিল্লী অভিমুখে আন এখন বাতানুকূল দবাযুক্ত সাপ্তাহিক ৰেল গাড়ীয়ে চলাচল কৰিব । দেশৰ প্ৰধানমন্ত্ৰী নৰেন্দ্ৰ মোদীয়ে দেশৰ দীৰ্ঘতম ৰেল আৰু পথ সংযোগ থকা দুখলপীয়া দলংখন উদ্বোধন কৰা পাছত কেইবাখনো যাত্ৰীবাহী ৰেল চলাচল কৰিছিল যদিও দ্ৰুতবেগী দূৰণিবটীয়া ৰেল চলাচল কৰা নাছিল । আজিৰে পৰা প্ৰথমখন দূৰণিবটীয়া দ্ৰুতবেগী ৰেল যাত্ৰা আৰম্ভ কৰা হৈছে ৷

লগতে পঢ়ক :চিৰিয়াখানাত গো-মাংস নিষিদ্ধকৰণক কেন্দ্ৰ কৰি প্ৰতিবাদ