অসম চিকিৎসা মহাবিদ্যালয়ত অগ্নিকাণ্ডঃ সদ্যোজাত শিশুৰ মৃত্যু

যোৱা নিশা ডিব্ৰুগড়স্থিত অসম চিকিৎসা মহাবিদ্যালয়ৰ প্ৰসূতি ৱাৰ্ডত সংঘটিত হয় এক ভয়ংকৰ অগ্নিকাণ্ডৰ ঘটনা ৷ অগ্নিকাণ্ডৰ ফলত নিহত হয় এটি সদ্যোজাত শিশু ৷

ডিব্ৰুগড়, 9 নৱেম্বৰ :অসম চিকিৎসা মহাবিদ্যালয় চিকিৎসালয়ৰ প্ৰসূতি বিভাগত নিশা সংঘটিত হোৱা ভয়ংকৰ অগ্নিকাণ্ডত এটি শিশুৰ মৃত্যু হয় ৷ দেওবাৰে নিশা ডিব্ৰুগড়ৰ অসম চিকিৎসা মহাবিদ্যালয় চিকিৎসালয়ৰ প্ৰসূতি কক্ষৰ শিশুসকলক ৰখা আইচিইউত সংঘটিত হয় অগ্নিকাণ্ডৰ ঘটনা ৷

বৈদ্যুতিক শ্বৰ্ট চাৰ্কিটৰ ফলত সংঘটিত হোৱা এই অগ্নিকাণ্ডৰ ফলত চিকিৎসালয়খনত ৰোগী আৰু অভিভাৱকৰ মাজত হুৱাদুৱাৰ সৃষ্টি হয় । শতাধিক ৰোগী চিকিৎসালয়খনৰ বাহিৰলৈ দৌৰি ওলাই আহে ।কোলাত সদ্যজাত শিশু লৈ লৰি-ঢাপৰি ওলাই অহা ৰোগীসকলৰ ফলত নিশা এক বৰ্ণনাতিত পৰিস্থিতিৰ সৃষ্টি হয় চিকিৎসালখনত । চতুৰ্থ, তৃতীয়, দ্বিতীয় মহলাত থকা প্ৰসূতি আনকি কেইঘণ্টামান পূৰ্বে জন্ম হোৱা শিশুকো কোলাত লৈ চিকিৎসালয়খনৰ বাহিৰলৈ ওলাই আহে ৰোগী আৰু অভিভাৱক ।

ঘটনাৰ লগে লগে চিকিৎসালখনৰ বিজুলী সংযোগ বিছিন্ন কৰি দিয়াত অন্ধকাৰত কেইবাজনো ৰোগী আঘাতপ্ৰাপ্ত হয় । ইফালে বিজুলী সংযোগ বিছিন্ন হৈ যোৱাত ভেন্টিলেশ্বনত থকা এতি শিশুৰ মৃত্যুও হয় । চিকিৎসালয়খনৰ নিৰাপত্তাৰক্ষী আৰু অগ্নিনিৰ্বাপক বাহিনীৰ প্ৰচেষ্টাত অৱশ্যে ক্ষিপ্ৰতাৰে জুই নিৰ্বাপিত কৰা হয় যদিও ঘটনাক লৈ এতিয়াও চাঞ্চল্য অব্যাহত আছে ৷

লগতে পঢ়ক :চিকিৎসালয়ৰ আজৱ কাণ্ড: জীৱন্ত শিশুক মৃত ঘোষণা