অসম চিকিৎসা মহাবিদ্যালয়ৰ ক'ভিড ৱাৰ্ডত চুৰি মূল্যৱান সামগ্ৰী

অসম চিকিৎসা মহাবিদ্যালয়ৰ ক'ভিড ৱাৰ্ডত চুৰি মূল্যৱান সামগ্ৰী ৷ ক'ভিড মৃতদেহৰ পৰা নাইকীয়া হৈছে মূল্যৱান আ-অলংকাৰ তথা অন্যান্য সামগ্ৰী ৷

ডিব্ৰুগড়, 2 নৱেম্বৰ :অসম চিকিৎসা মহাবিদ্যালয়ত কৰ'ণা মৃত্যু হোৱা লোকৰ দেহৰ পৰা নোহোৱা হৈছে সোণৰ চেইন, আঙুঠি, মোবাইল আৰু অন্য মূল্যবান সামগ্ৰী ৷ চিচি টিভি কেমেৰাৰে নিৰীক্ষণ, আন আন ৰোগী আৰু ৰোগীৰ অভিভাৱকৰ প্ৰবেশ নিষেধ থকা অসম চিকিৎসা মহাবিদ্যালয়ৰ ক'ভিড ৱাৰ্ডত সংঘটিত হৈছে এনেধৰণৰ চুৰিৰ ঘটনা ৷ কৰ'ণাত কোনো লোকৰ মৃত্যু হ'লে অসম চিকিৎসা মহাবিদ্যালয়ৰ পৰা নোহোৱা হয় মূল্যৱান আ- অলংকাৰ ৷

মৃত চিকিৎসক ডাঃ অনিল তামুলীৰ পৰিয়ালে উত্থাপন কৰিছে এই গুৰুতৰ অভিযোগ ৷ মহাবিদ্যালয়ৰ ক'ভিড ৱাৰ্ডত মৃত্যুক সাৱটি লোৱা বিশিষ্ট চিকিৎসক অনিল তামুলীৰ দেহৰ পৰা নোহোৱা হৈছে মূল্যৱান অলংকাৰৰ লগতে মানিবেগ ৷ জকাই আদৰ্শ মডেল হাস্পতালৰ জ্যেষ্ঠ চিকিৎসক হিচাপে কৰ্মৰত ডাঃ অনিল তামুলীৰ যোৱা ছেপ্তেম্বৰ মাহত ক'ভিড-19 ত আক্ৰান্ত হৈ অসম চিকিৎসা মহাবিদ্যালয়ত মৃত্যু হৈছিল ৷

মৃত চিকিৎসক অনিল তামুলী

কিন্তু ডাঃ তামুলীৰ মৃতদেহ পৰিয়ালক গতাই দিয়া সময়ত পৰিয়ালে লাভ নকৰিলে তেওঁ পিন্ধি থকা সোণৰ চেইন, মানিবেগ, এটিএম, ভোটাৰ কাৰ্ড আৰু ড্ৰাইভিং লাইচেঞ্চ । ইফালে মৃত ডাঃ অনিল তামুলীৰ পত্নী তথা ৰাজ্য চৰকাৰৰ শিক্ষা বিভাগৰ উচ্চ বিষয়া বন্দনা দত্ত তামুলীয়ে এই বিষয়ে লিখিতভাৱে অসম চিকিৎসা মহাবিদ্যালয় কৰ্তৃপক্ষ আৰু আৰক্ষী বিভাগত অৱগত কৰিও কোনো ন্যায় পোৱা নাই ৷

আৰক্ষী বিভাগক অভিযোগ মৃত চিকিৎসকৰ পৰিয়ালৰ

ডাঃ তামুলীৰ কন্যাই এই কথা চ'ছিয়েল মিডিয়াৰ জৰিয়তে উত্থাপন কৰা পাছতে এতিয়া এনে বহু ঘটনা পোহৰলৈ আহিছে । এনে ঘটনাই এতিয়া চকু কঁপালত তুলিছে সচেতন মহলৰ ।

মৃত চিকিৎসকৰ পৰিয়ালৰ অভিযোগ

লগতে পঢ়ক :ক্ষেত্ৰীত স্থাপন হ'ব ভাৰত-ইজৰাইল প্ৰকল্পৰ বিশেষ কৃষি কেন্দ্ৰ