পশ্চিম বিলাসীপাৰা, 23 জানুৱাৰী: ধুবুৰীৰ বিলাসীপাৰা মহকুমাৰ অন্তৰ্গত সাপটগ্ৰাম দশমী ঘাটত এটা ভয়ংকৰ পথ দুৰ্ঘটানা সংঘটিত হয় ৷ বালি কঢ়িওৱা AS 01 EC - 0134 নম্বৰ ট্ৰাক এখনে মহতীয়াই নিয়ে এজন ছাত্ৰক ৷ ফলত থিতাতে নিহত হয় ছাত্ৰজন ৷ নিহত ছাত্ৰজন বালাপাৰা ১ম খণ্ড গাঁৱৰ আতিকুৰ ৰহমানৰ পুত্ৰ মাহমাদুল হাছান (১০) বুলি জানিব পৰা গৈছে ৷
এই দুৰ্ঘটনাক কেন্দ্ৰ কৰি উত্তেজিত হৈ পৰে একাংশ ৰাইজ ৷ ইফালে একাংশ উত্তেজিত ৰাইজে জ্বলাই দিয়ে ঘাঘমাৰী বালি মহলত থকা তিনি খনকৈ বালি কঢ়িওৱা ট্ৰাকৰ লগতে বালি মহলৰ অস্থায়ী কাৰ্যালয়টো ৷
বিলাসীপাৰাত ট্ৰাকে মহতিয়ালে এজন 10 বছৰীয়া ছাত্ৰক নিতৌ সাপটগ্ৰাম চহৰৰ মাজ মজিয়াৰে দিনে নিশাই সাপটগ্ৰাম বন বিভাগৰ বিষয়া কৰ্মী আৰু আৰক্ষীৰ ছত্ৰছায়াত অবৈধভাৱে শিল বালি কঢ়িওৱা বুলি অভিযোগ কৰে স্থানীয় ৰাইজে ৷ তেনে সময়তে তীব্ৰ বেগী বালি কঢ়িওৱা ট্ৰাকে কণ মানি ছাত্ৰজনক মহতীয়াই নিয়াত অধিক উত্তেজিত হৈ পৰৈ ৰাইজ ৷ অবৈধভাৱে বালি শিল কঢ়িওৱা ট্ৰাক চলাচল বন্ধ কৰাৰ দাবীত নিহত ছাত্ৰজনৰ মৃতদেহ লৈ সাপটগ্ৰামৰ মুল পথ অৱৰোধ কৰে উত্তেজিত ৰাইজে ৷
ইফালে পৰিস্থিত উত্তপ্ত হৈ পৰাত প্ৰশাসনে আৰক্ষী আৰু অৰ্ধ সামৰিক বাহিনীৰ জোৱান নিয়োগ কৰে ৷ পৰবৰ্তী সময়ত বিলাসীপাৰা মহকুমা আৰক্ষী বিষয়া উপস্থিত হৈ সকলো দিশ তদন্ত কৰি উচিত ব্যৱস্থা গ্ৰহণৰ আশ্বাস প্ৰদান কৰাত পৰিস্থিতি নিয়ন্ত্ৰণলৈ আহে আৰু ৰাইজে পথ অৱৰোধ বাতিল কৰে ৷ আনহাতে, অতি শীঘ্ৰে এই ঘটনাটোৰ তদন্ত কৰি দুৰ্ভগীয়া পৰিয়ালটোক 20 লাখ টকা সাহাৰ্য প্ৰদান কৰিবলৈ চৰকাৰক দাবী জনাইছে স্থানীয় ৰাইজে ৷
লগতে পঢ়ক-গহপুৰৰ বালিজানত পথ দুৰ্ঘটনাত নিহত দুগৰাকী বেংক কৰ্মচাৰী
