শনিবাৰৰ পৰা নীতি আয়োগৰ পঞ্চমখন অধিবেশন আৰম্ভ

এই অধিবেশনত খৰাং, কৃষি খণ্ডৰ ক্ষয় ক্ষতি, বৰষুণৰ পানী সংৰক্ষণ, খাৰিফ শস্য বাবে প্ৰস্তুতি আদি বিষয়ক প্ৰধান্য দিয়া হ’ব ৷

নতুন দিল্লী, 15 জুন: প্ৰধানমন্ত্ৰী নৰেন্দ্ৰ মোদীৰ দ্বিতীয় কাৰ্যকালৰ প্ৰথম বৈঠক আৰম্ভ ৷ 2019 চনৰ বাজেট অধিবেশনৰ প্ৰাক মুহুৰ্তত প্ৰধানমন্ত্ৰীৰ এই অধিবেশন ৷ প্ৰধানমন্ত্ৰী নৰেন্দ্ৰ মোদীৰ অধ্যক্ষতাত নীতি আয়োগৰ পঞ্চমখন অধিৱেশন শনিবাৰৰ পৰা ৰাষ্ট্ৰপতি ভৱনত অনুষ্ঠিত হৈছে ৷ এই অধিৱেশনত খৰাং, কৃষি খণ্ডৰ ক্ষয় ক্ষতি, বৰষুণৰ পানী সংৰক্ষণ, ৰবি-খাৰিফ শস্য বাবে প্ৰস্তুতি আদি বিষয়ক প্ৰধান্য দিয়া হ’ব ৷ ইয়াৰ উপৰিও এই অধিৱেশনখনত মাওবাদী অধ্যুষিত অঞ্চলসমূহৰ নিৰাপত্তা ক্ষেত্ৰত অধিক গুৰুত্ব প্ৰদান কৰা হ’ব ৷

অধিৱেশনখনত অংশগ্ৰহন কৰিছে ৰাজ্যসমূহৰ মুখ্যমন্ত্ৰী, কেন্দ্ৰীয় শাসিত অঞ্চলসমূহৰ লেফটেনেণ্ট গবৰ্ণৰ, কেন্দ্ৰীয় মন্ত্ৰী আৰু উচ্চ পদস্থ চৰকাৰী বিষয়া সমূহ ৷ অৱশ্যে এই অধিবেশনখন ফলপ্ৰসু নহ'ব বুলি মন্তব্য কৰি অধিবেশনখনত অংশগ্ৰহন কৰাৰ পৰা বিৰত থাকে মমতা বেনাৰ্জী আৰু কে চন্দ্ৰশেখৰ ৰাও ৷ উল্লেখ্য যে নীতি আয়োগৰ প্ৰথমখন অধিবেশন 8 ফেব্ৰুৱাৰীত অনুষ্ঠিত হৈছিল ৷